fbpx
October 01, 2022

Contestando SIMAR: Minister-president ta contra-aresta puntonan di mal contento

Share on Facebook
Share on Whatsapp
0
0
Contestando SIMAR: Minister-president ta contra-aresta puntonan di mal contento
Contestando SIMAR: Minister-president ta contra-aresta puntonan di mal contento


Prome Minister Evelyn Wever-Croes, diahuebs a ricibi un carta di e sindicato di enseñansa, SIMAR, relaciona cu cuater punto di mal contento den e sector di enseñansa. Prome Minister a contesta e carta mesora indicando tambe cu e ta considera cu ta importante pa contra-aresta esakinan inmediatamente.

𝗔𝗨𝗠𝗘𝗡𝗧𝗢 𝗗𝗜 𝗧𝗔𝗥𝗜𝗙𝗔 𝗗𝗜 𝗔𝗪𝗔:
Presidente di Sindicato SIMAR, Josephine Albertus a elabora riba e aumento di tarifa di awa, expresando cu den e veld di enseñansa tin preocupacion cu e aumento di tarifa manera cu WEB a anuncia diahuebs mainta, lo ta devastador pa hopi famia. Ademas di esaki, Albertus a keha cu SIMAR no a wordo envolvi ni informa adelanta riba e aumento di tarifa aki.

Riba esaki, Prome Minister a informa Albertus di SIMAR, cu mescos cu Albertus, diahuebs mainta dia 30 di juni, Gobierno di Aruba desagradablemente a wordo sorprendi cu e anuncio di WEB pa hisa tarifa di awa sin cu esaki tawata tin aprobacion di Gobierno siendo cu Gobierno ta na mesa di negosacion cu WEB y Elmar riba e topico aki.

Prome Minister a informa Albertus tambe cu Minister di Energia, Glenbert Croes ta trahando riba esaki pasobra Gobierno di Aruba ta mas preocupa cu ne, pasobra Gobierno ta preocupa pa henter Aruba y Gobierno ta buscando un solucion.

𝗥𝗘𝗖𝗢𝗥𝗧𝗘 𝗗𝗜 𝟱%:
Riba e di dos punto di Albertus di SIMAR, e ta expresa duda si nan lo haye e 5% bek of no. Contestando Albertus di SIMAR, Prome Minister a informe, mescos cu Secretario di Estado Alexandra van Huffelen y Prome Minister mes tambe den bastante ocacion y extensamente, na placa chikito, dia 20 di juni ultimo, cu Aruba ta e unico pais cu a yega na un acuerdo cu Hulanda bou di cua condicion Aruba por cuminsa stop e recortenan. Manera cu ta conoci, e acuerdo aki a wordo aproba door di Conseho di Minister di Reino dia 24 di juni ultimo.

Gobierno di Aruba aworaki ta trahando cu tur forsa pa cumpli cu e condicionnan pa asina cumpli cu e plan y e intension ta pa otro luna, juli, paga e 5% na tur trahado di Gobierno y esunnan cu ta traha pa fundacionnan cu ta subsidia pa Gobierno.

𝗣𝗥𝗜𝗝𝗦 𝗔𝗨𝗠𝗘𝗡𝗧𝗢 𝗗𝗜 𝗚𝗔𝗦𝗢𝗟𝗜𝗡:
Riba e preocupacion aki cu Albertus di SIMAR a expresa den su carta, Prome Minister a splic’e, manera ya ta conoci, e aumento di prijs di gasolin, ta e resultado di e aumento internacional di e prijsnan di gasolin y di crudo. Esaki manera nos sa, ta e consecuencia di e conflicto di Ukraina. Esaki ta un problema mundial y Aruba no ta un exepcion den esaki. Y mientras cu e prijsnan ta keda subi riba mercado internacional, lamentablemente, e prijsnan na Aruba tambe lo sigui subi. “Gobierno ta siguiendo e desaroyo aki hopi di cerca pasobra nos ta hopi preocupa pa esaki tambe”, Prome Minister a expresa.

𝗔𝗥𝗘𝗚𝗟𝗢 𝗗𝗜 𝗩𝗨𝗧:
Manera cu recientemente Gobierno di Aruba a anuncia, a habri posibilidad pa un areglo di VUT pa ambtenaar. Albertus ta di opinion cu e areglo di VUT no ta amplio pa tur docente aplica of kita di trabou.

Prome Minister, contestando Albertus, a expresa cu e ta comprende e mal contento aki pero ta supone cu como sindicato di maestronan, cu Albertus ta consciente tambe cu tin un escases di docente na Aruba. “Ta algo sumamente iresponsabel pa haci bou di e circunstancianan actual si Gobierno duna VUT na tur hende cu kier”, Prome Minister a expresa.

Tin cierto circunstancia cu por duna VUT na docente. Pa esaki, Prome Minister a conseha sindicalista Albertus pa bay den deliberacion cu Directie Onderwijs y talves hunto nan por bin cu un maneho bou di cua condicionnan lo por duna VUT na docentenan.

E carta di Prome Minister dirigi na Presidente di Sindicato SIMAR, Josephine Albertus, a wordo manda diahuebs mes mesora despues cu a ricibi e carta di e sindicato, sperando cu Albertus y Sindicato SIMAR comprende tur loke cu a wordo splica riba nan mal contentonan y si tin mester, lo sigui atende cu preocupacionnan cu tin.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.