fbpx
October 01, 2022

AVP kier sa con lo para cu e docentenan di Papiamento 

Share on Facebook
Share on Whatsapp
0
0
AVP kier sa con lo para cu e docentenan di Papiamento 
AVP kier sa con lo para cu e docentenan di Papiamento 


Miembro di Parlamento di Aruba mr. Mike Eman a dirigi na Minister di Enseñansa un serie di pregunta relacion cu e echo cu tin diessies (16) maestro di scol specialisa cu a agradua cu un diploma di segundo grado pa e materia di Papiamento, pero cu NO por haya trabou den enseñanza pa eherce nan profesion e aña aki. E informacion aki a causa un desapunto y preocupacion grandi cerca e docentenan profesional aki. Parlamentario mr. Mike Eman a reuni cu e grupo di maestro di scol cu a caba di gradua como docente di segundo grado, di papiamento pa asina scucha nan precupacion pa cu e situacion cu tin actualmente. Parlamentario mr. Mike Eman ta lamenta e manera con Gabinete Wever-Croes no tin atencion pa brinda un solucion real pa e preocupacion di e dieseis maestro nan di Papiamento recien gradua. Den cuadro di e preocupacion di e maestronan parlamentario mr. Mike Eman a lansa un serie di pregunta na e Minister di Enseñansa;

  1. Minister por informa na ki momento minister a tuma nota di e problema cu a surgi pa e 16 docentenan aki? Kico a dicidi di haci cu e informacion ricibi na e momento ey?
  2. Desicionnan pa cuminsa cu estudionan p’e docentenan normalmente ta wordo tuma a base di un planificacion detaya di e demanda p’e docentenan den un of otro ramo o materia specifico, a corto plaso y plaso medio. Minister por informa a base di kico a dicidi di cuminsa dos estudio, uno cu duracion di dos aña y uno cu duracion di cuatro aña, pa e mes un segundo grado den e materia di Papiamento, den e mercado di trabou chikito di enseñansa di Aruba?
  3. Pa cualkier persona cu haci e esfuerzo pa studia pa logra un grado profesional den enseñansa, tende na final di su estudio cu no tin trabou pe, ta hopi duru. Pa hende cu a laga otro trabou y entrada, y a scoge pa bay studia pa asina haci un cambio di carera profesional, e mal noticia cu no tin trabou den e ramo cu nan a caba di studia p’e, ta ainda mas duru pa acepta. Minister por informa ta kico ta bay haci pa percura pa e 16 docentenan profesional aki por cuminsa traha como docente mas lihe posibel?
  4. Ta conoci cu e maestro- y docentenan tin e conocemento di materia y e habilidadnan educativo pa haci mas cu solamente “duna les” na un grupo di studiante. Por pensa riba e trabounan di desaroya materia den seccion di curiculo di Departamento di Enseñansa, e necesidad di guia di e studiantenan den nan estudio, e necesidad pa mehora e resultado di graduacion di estudionan den enseñansa secundario anochi y di “landsexamen”, e necesidad pa profesionalisa e nivel di uzo di nos idioma Papiamento den tanto e aparato di gobierno como den sector priva.  Minister por informa si a busca oportunidad di trabou pa e 16 docentenan aki den e otro areanan di enseñansa y curso na Aruba manera menciona aki? 
  5. Minister por informa den un forma mas extenso, con e planificacion di trabou pa maestro di scol na Aruba, den e diferente sectornan di enseñansa y pa e diferente materianan den e curiculonan di scolnan basico y secundario ta? Minister por parti e informacion aki cu studiantenan y futuro studiantenan cu scohe e profesion di maestro o docente, tanto na Aruba como den exterior?

Mediante e acion aki Parlamentario mr. Mike Eman kier ilustra a urgencia di e situacion y ta urgi atencion debido pa e preocupacion di e maestronan cu na e momento nan aki ta wordo perhudica financieramente y profesionalmente. Varios di e personanan cu a cuminsa e estudio aki tabata tin trabou caba, pero a dicidi di haci un “cambio di carera”, den e speransa di ocupa e funcion di docente. E tabata pa nan un escogencia conciente y specifico, despues di a traha pa hopi aña den un otro profesion. Awor cu e grupo di docente a termina nan estudio di cuatro aña, ta resulta, segun informacion ricibi, cu no tin mas trabou pa nan den enseñansa na Aruba. Parlamentario mr. Mike Eman ta subraya cu e lo keda lucha pa e diesseis maestronan di e materia di Papiamento ricibi un solucion husto pa nan preocupacion.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.