fbpx
October 01, 2022

ATIA: Aumento den BBO ta un solucion facil, pero no corecto

Share on Facebook
Share on Whatsapp
0
0
ATIA: Aumento den BBO ta un solucion facil, pero no corecto
ATIA: Aumento den BBO ta un solucion facil, pero no corecto
ATIA: Aumento den BBO ta un solucion facil, pero no corecto
Posted on 08/19/2022 10:49 am AST | Updated on 08/19/2022 10:50 am AST

ORANJESTAD – Un aumento den BBO mas cu claro ta un solucion facil, pero no ta locual ta corecto. Asina e gremio comercial Aruba Trade & Industry Association (ATIA) a reacciona diabierna despues di a tuma nota cu gobierno a dicidi pa para e introduccion di BTW y scohe aumento di BBO na su lugar. 

E ANUNCIO

ATIA ta referi na e anuncio di diahuebs merdia di Gobierno di Aruba representa pa Prome Minister di Aruba, mr. Evelyn Wever-Croes hunto cu Minister di Integridad, Ursell Arends, unda cu a informa tocante algun decision tuma relaciona cu e reforma fiscal. Den esaki nan a anuncia cu a para introduccion di BTW per 1 januari 2023 y lo reemplasa esaki cu un aumento den tarifa di BBO pa 2023. Ta premira cu e aumento aki lo ta entre 1 pa 1.5% extra riba e 6% cu tin actualmente. Segun prome minister a enfatisa, a tuma e decision aki despues di a tene reunion cu gremio y tambe algun otro partner strategico di comunidad.

ATIA TA DESMENTI

ATIA, como representante y voz di comercio y su miembronan, a desmenti e ponencia aki y kier clarifica cu ATIA ta pro BTW.  Ya ta pa algun tempo caba cu ATIA a bin ta adverti Gobierno di Aruba cu nan ta tardando cu nan decisionnan relaciona cu introduccion di BTW. 

BBO TA SOLUCION FACIL

Un aumento den BBO mas cu claro ta un solucion facil, pero no ta locual ta corecto. Mester considera cu esaki lo traduci den cu e cumplimento di pago di belasting lo reduci, cu consecuencia significante pa esunnan cu ta paga nan belasting debidamente. Pues, en bes di a introduci, manera priminti, un sistema di impuesto simpel y indirecto, a opta pa aumenta BBO, hustificando esaki cu e efectonan inflatorio di un introduccion di BTW. 

Un biaha mas ATIA ta cuestiona cierto decisionnan di gobierno y alabes ta di opinion cu gobierno no ta cumpliendo cu locual a anuncia desde un principio y cu locual ta stipula den e Landspakket firma cu Gobierno di Hulanda.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.