fbpx
December 06, 2022

Fiscal a exigi 5 aña di prison pa hoben cu a basha bala dilanti night club den Playa

Share on Facebook
Share on Whatsapp
0
0
Fiscal a exigi 5 aña di prison pa hoben cu a basha bala dilanti night club den Playa
Fiscal a exigi 5 aña di prison pa hoben cu a basha bala dilanti night club den Playa

ORANJESTAD – Awe mainta e hoben homber J.S.(19) a presenta dilanti Hues pa e caso penal cu Ministerio Publico a cuminsa contra dje. Ta trata aki di un otro caso di tiramento.

  SOLO DI PUEBLO por a compronde cu e tiramento a sosode dilanti Jokers Night Club den De La Sallestraat. E acusacionnan cu Fiscal a presenta den Corte contra J.S. ta cu riba 25 April 2022 el a purba di mata hende dilanti Jokers Night Club. Tambe cu e tabatin un arma di candela. Ademas cu intencionalmente el a tira riba e hombernan d S. y B., kendenan tabata scondi tras di un auto riba cual S. a tira.

EVENTO DI RAP A CABA DEN TIRAMENTO

Durante tratamento di e caso a sali na cla cu a organiza un evento di Rap pa uni y trece paz entre gangnan. Na final di e evento tabatin pelea y bashamento di bala pafor di e club nocturno cu ta keda den un zona habita.

SOSPECHOSO A DESMENTI

   Hues a puntra S. di e acusacionnan ta cuadra. J.S. ta desmenti di a tira. El a bisa cu e tabata eynan y a bay scucha hendenan canta. El a admiti di a subi riba e stage den e club. El a bisa cu el a bay scucha su primo canta. Hues a bisa cu tin hende ta bisa cu J.S. ta forma parti di gang di Rancho. El a bisa Hues cu e no ta den ningun gang. Segun J.S., el a scucha tiramento pafor di club y el a sali pafor. El a scucha mas tiro pafor y el a drenta den un auto. Ora Hues a puntr’e den cual auto el a drenta, el a bisa cu e no sa den cual auto el a drenta.

   Hues a bisa cu e homber J.W. kende conoce J.S., a bisa Polis cu e tabata cu un otro homber den auto y tabata cla pa reverse y J.S. a subi den auto y a bisa pa move. J.W. a bisa cu el a hiba J.S. na su cas na Madiki. Segun J.S., e no conoce J.W.

   Hues a mustra cu Polis a mustra J.W. imagennan di e video di seguridad. J.W. a bisa Polis cu e ta mira J.S. ta los tiro. Polis tambe ta bisa di ta mira J.S. ta tira. Ta asina cu via social media, Polis a mira J.S. den e club cu un tas di schouder y despues ta mir’e pafor ta tira.

Segun J.S., e persona cu a tira no t’e. El a bisa Hues cu no ta e so tabatin dread logs, no ta e so tabatin un tas di schouder. Hues a remarca cu e tas tabata di marca cu hopi hende lo tin gana di tin. E ora ey J.S. a bisa Hues pa trece e hendenan su dilanti pa bisa cu ta el a tira.

VIDEO DI TIRAMENTO

Den sala di Corte a usa un screen grandi pa pasa imagennan den e club noctuno, caminda J.S. a reconoce su mes para riba stage. Despues a pasa e video di seguridad cu Fiscal a presenta. Riba e video por mira cu despues di e evento na otro banda di caminda dilanti di Jokers Night Club, tabatin pelea andando. Despues di un rato por a mira cu tabatin tiramento y for di banda di e night club por mira un persona cu ta sospecha cu ta J.S., tuma posicion y a los 4 tiro riba un otro auto na otro banda di caminda, tras di cual tabatin algun persona scondi. For di otro banda di caminda, tambe por mira un hende ta los tiro y despues un otro.

   Hues a bisa cu si compara e imagen di J.S. paden cu e imagen pafor, ta mustra cu ta J.S. mes. J.S. a keda para riba cu e persona cu a tira no t’e. Ora Hues a mustr’e riba declaracion di J.W., el a bisa cu e no sa kico J.W. ta papia.

Abogado mr. Maldonado a bin cu un stick cu ta pasa tur cos poco poco y a mustra cu esun cu a tira 4 tiro, 1 di e balanan ta dal dilanti un auto y un otro riba caminda. Tambe por a mira e otro dos tironan cu a bin for di otro banda di caminda.

FISCAL

Fiscal a bisa Hues 24 April 2022 mey anochi a surgi pelea na otro banda di caminda na Jokers Night Club y despues tiramento. Polis a haya imagenan via media di paden di e night club y ta mira J.S. para paden. A compara e imagen di esun cu a tira pafor di night club cu e imagen di J.S. y nan ta hopi parecido. E imagennan ta mustra cu tur dos ta mesun cos bisti, e mesun tas di schouder y dread logs. Tambe tin tattoo riba man cu ta parecido cu loke J.S. tin. Fiscal a sigui bisa cu e homber B. cu tabata scondi tras di auto, a reconoce J.S. como esun cu a tira riba dje. E homber J.W. a reconoce J.S. riba video di seguridad como e persona cu a drenta den su auto. Ademas el a bisa cu J.S. a subi den su auto despues di e tiramento. Fiscal a conclui cu tur e declaracionnan aki ta mustra cu esun cu a tira ta J.S.

PURBA DI MATA

Fiscal a mustra cu J.S. a los minimo 4 tiro riba e auto di d S., tras di cual tabatin mas hende scondi. E momento ey tabatin mas hende ta cruza caminda. Bala lo por a herida un persona mortal. Na opinion di Fiscal, J.S. a tuma e riesgo cu e por a mata un hende.

   E ta haya J.S. culpable di intento di mata. El a mustra cu net tras di e auto riba cual a tira, tin cas. Danki Dios ningun hende a muri y un hende a resulta herida na su man.

ARMA UN PROBLEMA SERIO

   Fiscal a mustra cu arma ta un problema serio na Aruba. El a menciona cu tabatin caso di tiramento entre gang di Bushiri y Yaburibari. Aña pasa tabatin e caso lamentable caminda un dama hoben a wordo tira mata. Fiscal a tuma J.S. na malo cu e ta desmenti. El a exigi 5 aña di prison, kitando e tempo cu e ta sera.

Hues, despues di a scucha defensa di abogado, a sera tratamento di e caso y a bisa cu dia 21 October 2022 pa 8.15 lo tin sentencia.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.