fbpx
December 08, 2022

Guera pa herencia di ex-La Linda: A demanda pa cera nietonan di Anna Hochman den KIA

Share on Facebook
Share on Whatsapp
0
0
Omaira Britten: Mester bin un claridad riba henter asunto di ex-La Linda
Omaira Britten: Mester bin un claridad riba henter asunto di ex-La Linda


Diabierna mainta a tuma luga un caso peculiar den corte, ora cu curator mr. Jeannot de Cuba a pidi hues pa “geizel” e yiunan di defunto Haim Hochman, yiu mas chikito di defunto Anna Hochman di ex-La Linda. E dos nietonan Aaron Joshua Hochman y Bilhah Hannah Hochman ta nenga di renuncia e herencia, pa por agilisa un proceso cu ta tumando luga na un banco na St. Kitts & Nevis. 

Den su afan pa “warda” placa di La Linda tur rond di mundo, Haim Hochman a manda algun miyon na un banco na e isla ey. Pero, pa e curator por yega na e suma, cu entretanto ta den beslag, e mester pa e dos yiunan di Haim renuncia e herencia. E ta un procedura complica pero necesario, sino ta dificil pa yega na e suma ey. Pero como cu e yiunan ta para riba cu nan no ta firma nada, awo a pidi hues pa cera nan den prizon, na KIA, te ora cu nan firma. No ta un peticion comun esaki y como cu e dos yiunan no a presenta pa tratamento di e caso den corte, ta haci e asunto mas complica ainda y dificil. Dentro di dos siman hues lo tuma un decision den e caso aki, den cual famia ta den guera cu otro pa un fortuna cu nan ta calcula awendia na mas o menos 80 miyon florin.

Omaira Britten, prima di e dos yiunan di Haim, a bisa pafo di edificio di corte cu abogado Jeannot de Cuba ta demandando su primonan pa nan renuncia nan herencia. El a bisa cu e abogado ta buscando esey for di hopi tempo caba, pero cu nan no a firma nada p’e te dia di awe. Di otro banda, segun Britten, como cu Aaron y Bilhah a nenga di firma, e curator a pone beslag riba tur tereno disponibel den e herencia. Asina por ehempel, lo tuma luga benta di e tereno di ex-La Linda den Caya Betico Croes, cu awendia ta un parkeerplaats, cu e no por bend’e. Segun Omaira Britten, si abogado Jeannot de Cuba bend’e toch, e lo manda e caso aki te Hulanda. 

Di acuerdo cu pensamento di Omaira Britten, e parkeerplaats en cuestion ta pertenece na Aaron Hochman, unda cu e wela, bou di huramento, a pasa tur tereno y propiedad pa mita di dje y mita di Haim. E edificio di La Linda por ehempel, a cumpr’e for di yiunan di Luis Hochman. Anto dicon no ta persigui e muchanan ey, cu tambe a firma un declaracion cu nan debe placa. “Nan tin yen tereno na Aruba. Pero e dos muchanan aki (Aaron y Bilhah) si ta wordo persigui door di e curator. Ocho aña e curator aki a haya chens pa bende e propiedadnan di Anna. Ni un e no a bende. E unico el a bay pleita uno, esta e restaurant Aruba Experience, pa e pida tereno ey dilanti”, asina Omaira Britten a splica.

Pero, e prima di e yiunan Hochman a bisa dilanti corte cu e tin masha problema con e institucion di husticia ta bayendo. “Mi tin duele cu Aruba, en bes di nos pueblo lanta riba, pa mira cuanto cos, cuanto yamada mi ta haya pa dia, di e casonan asina, di casnan ta wordo kita, pasobra nan no ta lanta para pa nan derecho. Y aki tabata e derecho di e muchanan aki.”

Pa mas lesa TREMPAN.COM.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.