fbpx
November 28, 2022

Presidente di Parlamento lo start investigacion: Parlamentario a horta cuminda di otro

Share on Facebook
Share on Whatsapp
0
0
Presidente di Parlamento lo start investigacion: Parlamentario a horta cuminda di otro
Presidente di Parlamento lo start investigacion: Parlamentario a horta cuminda di otro


Tin un caso di ladronicia den Parlamento di Aruba, pa cual e presidente, mr. Edgard Vrolijk di MEP lo start un investigacion riba dje. No ta trata di investigacion riba material of documentonan cu a disparce sino riba ken a come lomito, pisca cora of galiña stoba di otro. T’asina drs. Mervin Wyatt-Ras a menciona den parlamento durante tratamento di presupuesto supletorio. E parlamentario di AVP a duna di conoce cu el a inscribi pa ricibi cuminda pero ora e cuminda a yega; un hende den sala, sea parlamentario of minister a horta su cuminda. E dia cu parlamentario a inscribi pa cuminda tabatin opcion pa scoge entre lomito, pisca cora of galiña stoba.

E ta normal cu ora ta trata reunionnan cu ta bay largo, parlamento cu placa di pueblo ta cumpra cuminda pa tur hende den sala. No ta minister y parlamentario so ta ricibi cuminda sino consehero, polis y tur personal di parlamento tambe. Riba lista di cuminda, ta tuma nota cu MAS y Accion 21 no a inscribi pa cuminda pero di AVP a inscribi Wyatt-Ras, Gerlien Croes y Rycond Santos do Nascimento. Locual si ta hala atencion ta cu cada parlamentario di AVP a pidi pa un foam box pa persona. Contrario na RAIZ y MEP, ta wak cu algun a inscribi pa no un sino dos y te hasta tres foam box pa cada persona. Algun parlamentario di MEP y RAIZ a pidi pa hasta extra aros y salada.

Rib’e echo cu drs. Mervin Wyatt-Ras no a ricibi su cuminda aunke a inscribi, e presidente di parlamento, mr. Edgard Vrolijk a sigura cu e lo cuminsa cu un investigacion pa wak ken t’esun cu dede largo cu a bay cu foam box di otro parlamentario.

Tocante Edgard Vrolijk

Na 2000 el a termina su estudio na nivel HBO como maestro di scol specialisa pa educacion di 6 pa 12 aña. Na 2012 el a logra e titulo di Bachelor in Law y e aña ki el a obtene esun di Meester in Rechten. El a drenta arena politico na 2013 obteniendo 586 voto na su  nomber. Na 2017, el a aumenta pa yega na 749 voto. Den ultimo eleccion el a obtene 619 voto.

Tocante Mervin Wyatt Ras

Melvin Glorinda Wyatt-Ras, miho conoci como Mervin, ta bin di famia di tres yiu Ras-Bareño y ta casa. E ta un orthopedagogo, terapista di Hypnosis Rational y terapista di famia y di sistema. Pa diesdos aña el a traha den Departamento pa Asuntonan Social, seccion Dificultad di Bida y Famia. E tin 20 aña di trayectoria den Parlamento di Aruba y e ta e prome Presidente di Parlamento femenino di 2005 pa 2009 y di 2016 pa 2017. Entre 2010 y 2013 el a figura como parlamentario independiente despues di a bandona fila di partido MEP y prome cu a ingresa den partido AVP. Na 2017 el a obtene 661 voto y na e ultimo eleccion 580 voto.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.