fbpx
December 03, 2022

Aunke a yam’e haragan: Miguel Mansur tin un amor special pa Xiomara Maduro

Share on Facebook
Share on Whatsapp
0
0
Aunke a yam’e haragan: Miguel Mansur tin un amor special pa Xiomara Maduro
Aunke a yam’e haragan: Miguel Mansur tin un amor special pa Xiomara Maduro


Tur cos a cuminsa cu un “punto di ordo” durante pleno reunion publico pa trata Presupuesto 2023 den Parlamento di Aruba. Den e disertacion di minister-president, el a para un rato keto pa critica su opositor politico, Miguel Mansur, debi cu e lo a ofende Minister di Finansa y Cultura, mr. Xiomara Maduro. Pero, Mansur no a tuma aden y a pidi un punto di ordo, riba cual el a expresa su amor special pa e mandatario riba lista di MEP.

“E ta ofende mi colega Xiomara. E ta bisa cu mi colega Xiomara ta arogante, e ta ignorante, e no sa kico e ta haci, Señor Presidente, anto bo sa, e cosnan ey eigenlijk ta haci hopi dolor, Señor Presidente”, asina Prome Minister a critica durante su discurso. Mientras e tabata bisa esey, su colega Minister Maduro tabata grita den banda cu Mansur ta jaloers riba dje.

E parlamentario, un di esunnan cu mas voto sinta den Parlamento di Aruba, a lamenta cu su nomber a cay den e contexto ey y a hisa su mannan pa pidi un “persoonlijke feit”. Door di pidi esey, e ta referi na e Presidente di Parlamento cu a menciona su nomber den algo personal y pa dun’e derecho di replica. Mesora Presidente di Parlamento a concede e chens pa reacciona, riba cual el a bisa: “Prome Minister a insinua of a vocifera cu mi a bisa un biaha cu e Minister di Finansa ta ignorante, cu mi no ta stim’e. Mi kier aclaria cu mi tin un cariño special pa Xiomara. Mi tin gana di dun’e un brasa. Nunca di mi bida mi a yam’e pa ignorante. Si mi a bisa cu e ta haragan un biaha”.

Edgard Vrolijk, siendo Presidente di Parlamento, cu e rol pa dirigi e reunion aki, cu un sonrisa riba su cara a tuma palabra bek y a vocifera den microfoon “Danki Señor Mansur, e tabata mas bien un declaracion di amor en bes di ta un persoonlijke feit. Dal bay Su Excelencia”, dunando palabra bek na e premier di nos pais.

Prome cu e minister-president por a sigui riba su discurso, Minister di Finansa, mr. Xiomara Maduro a sac su cara abou y hariendo el a bisa su colega Dangui Oduber, sinta net band’i dje “Mi kier sali di aki den”, mientras cu el a tapa su cara cu ambos banda di man. Minister Oduber sinembargo a sigui chat den su celular y a limita e contesta na su colega cu un sonrisa.

Minister-president di otro banda no a aprecia e punto aki si. E no a hari manera tur e otro parlamentarionan y mas bien a sigui riba caso di Miguel Mansur. El a bisa cu “Señor Presidente, mi ta kere cu Sr. Mansur mester bira mas serio, pasobra bo no por ofende instituto di Minister di Finansa, dia ‘den dia ‘fo, bo ta cuestiona su conocemento, su capacidad, dia ‘den dia ‘fo, anto awo bo ta bin bisa mi ta bras’e, mi ta stim’e. Sorry, pueblo aya ‘fo merece di tin politiconan serio”, asina Minister Presidente mr. Evelyn Wever-Croes a bisa cu un bos serio y obviamenre disgusta cu e forma con Mansur ta ataca su amiga y colega constantemente.

Miguel Mansur, aunke nobo den politica, a sali pa prome bes riba lista cu 2019 voto individual. E tin mas sosten den pueblo cu Minister Xiomara Maduro, cu tin 13 aña den politica, pero cu tin 1883 voto personal. Den ultimo eleccion Maduro a cay cu 30% di su votonan. Su record tabata den eleccion di 2017, ora el a haya 2696 voto. El a bira minister y cay mesora den voto den e siguiente eleccion.

Tocante Miguel Mansur

Miguel Mansur ta un inversionista cu a bira un politico, despues di funda su mesun partido. E ta boga pa un politica nobo cu gobernacion confiabel na Aruba cu di berdad ta traha pa pueblo. El a studia na Serie Colorado School na Aruba, despues a sigui International School of Aruba, despues a sigui Institut Le Rosey y finalmente a caba Tufts University na Medford, na Massachusetts, na Merca. El a caba e estudio di International Relations and Economics. Desde 2019 e tabata presidente di Capitable LLC, cu oficina na Miami, Florida. Desde october 2020, Mansur a funda Partido Accion 21, a participa den eleccion na juni 2021 y a logra no menos di 2019 voto riba su nomber. E ta di cinco votegetter di Aruba, despues di Evelyn Wever (7518), Mike Eman (6668), Marisol Lopez (4191) y Dangui Oduber (2060).

Tocante Xiomara Maduro

Xiomara Jeanira Maduro ta naci dia 24 di december 1974, a participa den eleccion Parlamentario pa prome bes na aña 2009 y a haya 260 voto individual. E tempo ey el a asumi e puesto di Parlamentario pa Fraccion di MEP. Su popularidad a crece casi 10 biaha mas hopi den eleccion 2013, logrando no menos di 2445 voto riba su nomber y a sigui den funcion di Parlamentario. Den eleccion na September 2017, e candidata # 2 riba lista di MEP a haya 2696 voto. Dia 17 di november el a huramenta como Minister di Finansa, Asuntonan Economico y Cultura den Gabinete Wever-Croes, forma pa e coalicion di MEP(9), POR (2) y RED (1). Den e ultimo eleccion, Xiomara Maduro a baha den voto y a yega na 1883 voto, un caida di mas cu 30%. E ta awendia e di nuebe votegetter di Aruba, despues di E ta di cinco votegetter di Aruba, despues di Evelyn Wever (MEP), Mike Eman (AVP), Marisol Lopez (MAS), Dangui Oduber (MEP), Miguel Mansur (A21), Ursell Arends (Raiz), Glenbert Croes (MEP) y Gerlien Croes (AVP).

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.