fbpx
November 27, 2022

Varios medaya pa Aruba den Triathlon y Aquathlon

Share on Facebook
Share on Whatsapp
0
0
Varios medaya pa Aruba den Triathlon y Aquathlon
Varios medaya pa Aruba den Triathlon y Aquathlon


Diamars atardi tabatin un bon bini na aeropuerto pa e delegacion di seis atleta hubenil cu a regresa victorioso for di e competencia CARIFTA teni recientemente na Bermuda. E hobennan di 11 aña bay ariba a bin cu un total di shete medaya tanto individual como den relay den e disciplina di Triathlon y Aquathlon.

Entrenador Nicolaas Robert a duna di conoce cu a participa den tres categoria cu atleta masculino y  femenino. Diasabra ultimo a participa den Triathlon caminda Christian y  Rebecca Jansen a obtene medaya di oro cada un y Jeon Fernandez a bay cu medaya di brons, mescos cu Emma Gobert.

E ekipo di Relay consistiendo di Richard Sotelo, Rebecca Jansen, Cristiaan Jansen y Emma Gobert tambe a obtene medaya di brons. Pa loke ta trata Aquathlon, Aruba a bin cu dos medaya mas. Ta trata di un di brons pa Christian Jansen y otro di plata pa Jeon Fernandez.

T’asina cu e mchanan tin mas di seis luna entrenando y dedica specialmente pa e evento aki, a pesar di tabatin otro evento prome. Segun Robert, a enfoca riba CARIFTA pa e probabilidad di alcansa e posicionnan di mas halto.

E siguiente reto ta na 2023 na Bahamas caminda e seleccion di Aruba awo lo ta e centro dia atencion despues di a bin cu tur e medayanan aki. Otro islanan den Caribe lo bay prepara duro pa enfrenta y surpasa nos atletanan.

E entrenador a menciona cu ta necesario pa e atleta tin hopi disciplina y un sosten grandi di famia pa por alcansa e nivel aki. “Sin esey, nos no ta logra nada. Ta haya un tiki subsidio, pero sin e sosten di famia, no ta logra. E ta hopi dificil. Nos ta trahando poco poco pero duro pa logra bay cu nos atletanan afo.” El a yama danki na Minister di Deporte pa e subsidio ricibi, como tambe Comite Olimpico Arubano y tur mayor cu a coopera.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.