fbpx
December 01, 2022

Perla gymnastics Aruba International Cup lo ta den luna di november

Share on Facebook
Share on Whatsapp
0
0
Perla gymnastics Aruba International Cup lo ta den luna di november
Perla gymnastics Aruba International Cup lo ta den luna di november


Competencia internacional ta na caminda y p’esey a acerca e presidente di Perla Gymnastics, Miguel A. Ortiz pa e conta nos un poco mas riba e preparacion y fecha di e competencia, cu lo tuma luga na Aruba.

Centro Deportivo Betico Croes lo ta sede di e International Rhythmic Gymnastics Compitation cu lo tuma luga riba e dianan 24, 25 y 26 di November.

E disciplina di rhythmic gymnastics ta un combinacion di gymnastics artistico y ballet pero den gran mayoria (80%) mas ballet y e resto acrobacia.

Perla Gymnastics riba su mes tin un cuater aña di existencia. Na inicio ubica na Savaneta, caminda tabata duna les na un grupo di 15 mucha riba diaranson pero despues di un poco mas cu aña a haci preparacion pa muda y a logra ubica e ora na Santa Cruz.

Esaki a duna e oportunidad pa duna les riba diadomingo den un localidad nobo cu tin a penas un shete luna habri.

Perla gymnastics ta conta cu aproximadamente 35 deportista den ritmica cu ta den preparacion pa bay participa den e competencia. Cada un den diferente nivel y ta entre 6 pa 13 aña di edad.

Ortiz a duna di conoce cu nan a traha hopi duro pa trece competencia internacional Aruba y asina coopera cu e mayornan, como cu cada competencia internacional ta un gasto grandi pa cada atleta y su famia. No solamente den e disciplina aki pero deporte en general.

Asina mes kier stimula y haya mas competencia pa e atleta, pa engrandece e deporte pero yuda e atleta crece tanto fisica como psicologicamente den su deporte. Training diario ta fortalece e parti fisico y competencia ta pone den practica e preparacion mental di cada atleta.

Na mes momento Ortiz a informa cu e competencia internacional aki ta algo cu ta den plan pa keda organisa tur aña.

Competencia asina sigur ta keda husga na un nivel halto, cu hurado (nan) cualifica y cu lo exigi un bon presentacion di cada participante.

Ceremonia di apertura lo ta dia 24 di November y e otro dianan lo ta di competencia, for di 2:00 pm te cu 7:00 pm (dia 25 di November) y 9:00 am te cu 10:00 am (riba diadomingo 26 di November) cu entrada di Awg.20,= pa hende grandi y Awg.15,= pa mucha. Esnan bou di cuater aña di edad lo drenta gratis (cu identificacion valido)

Pueblo di Aruba ta invita na e di dos edicion di e competencia internacional di gymnastics, pa brinda sosten na nos atletanan cu lo duna lo miho di nan den representacion di nos isla. 

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.