Diahuebs mainta Corte a trata e caso penal contra Antonieta Morales Soto di 37 aña di edad, acusa cu den e periodo di maart 2019 pa november 2020, cu el a traha como dentista, e tabatin material p’e trabou aki, sin cumpli cu reglanan di Salud Publico y sin cu Gobierno di Aruba a reconoce su diploma. E acusado ta casa cu un Arubiano y tin yiu.
Su abogado, mr. Zuhaila Arendsz-Marchena, a splica cu su cliente for di inicio tabata habri y a admiti cu loke el a haci, di no spera su papelnan keda cla, tabata malo. Den Corte el a pidi su disculpa pa esaki tambe. E abogado a splica cu su cliente ta un dentista diploma y a entrega su papelnan na e departamento y instancianan concerni, prome cu AruBig a bini na vigor, pero no a haya contesta.
A surgi un situacion cu e tabata biaha sea pa Venezuela of Colombia pa atende su pashentnan aya, pero dado momento frontera a cera y e situacion a bira malo pe. “Den esaki el a tuma un decision fout y el a admiti esaki tambe.” Pero, e abogado a splica, e leynan cu ta regarda e tipo di casonan aki di Salud Publico, tin diferente mecanismo pa atende cu e problemanan cu por surgi den e sector. E ultimo herment pa uza, e ta bisa, ta e caminda penal.
“Esaki mester ta e ultimo paso, aunke cu e no ta obligatorio. Usualmente esaki ta e ultimum remedium den casonan asina. Esaki pasobra e ta impacta e dunado di cuido y su profesion.” P’esey e ta bisa cu por a tende e caso di un otro forma, di un forma administrativo.
Tambe a trece dilanti cu mester tin pruebanan legal y convincentemente. A mustra cu den e dossier ta sinti falta di cierto documentonan cu Corte mester tene cuenta cu esaki. “Nos no a haya nan y si no tin nan, no por bini cu un condena.”
Sentencia den e caso aki ta dia 27 di januari 2023 pa 8:15 am.
