fbpx
January 28, 2023

Sindicato di Polis cu palabra di profundo condolencia: “Auto no tabata adecua y sin airbag”

Share on Facebook
Share on Whatsapp
0
0
Sindicato di Polis cu palabra di profundo condolencia: “Auto no tabata adecua y sin airbag”
Sindicato di Polis cu palabra di profundo condolencia: “Auto no tabata adecua y sin airbag”


Sindicato di Polis a uni, na prome luga pa manda nan palabra di mas sincero condolencia na famia Illes y na Cuerpo Policial Aruba pa e perdida lamentabel y doloroso cu nan a caba di sufri. Un colega ta perde su bida tragicamente den accidente di auto, no mucho leu di Centro di Husticia caminda e ta labora.

Austin Illes colega y miembro di cuerpo policial a bira e prome morto den trafico, un hoben di apenas 24 aña di edad. Yiu di colega Marcel Illes, di departamento di recherche di cuerpo policial. Na e ocasion, tanto Presidente Rodney Solognier como e vice-presidente Rolando Maduro a hiba palabra na sitio.

Maduro a comparti cu e hoben cu a fayece tabata un polis ehemplar, trahando den departamento di atraco team y su perdida ta duel henter e korps masha tanto mes. Polis a perde un colega mas.

Di otro banda, Sindicato di Polis ( SPA) a manda un mensahe hopi skerpi, cla y fuerte na mandatario/ gobierno relaciona cu e tragedia cu a tuma luga na Macuarima, cu e auto envolvi den e accidente fatal aki, no ta auto adecua ni ekipa pa ta riba caminda. E ta un vehiculo cu no ta ekipa cu un airbag.

Maduro a enfatisa cu e echo aki por tabata e diferencia cu por  a scapa e hoben aki su bida. Ta un alerta fuerte pa gobierno, pa sinta na mesa, pone man duro pa haci cambio na bienestar di polis of realisa cu e tipo di desgracia asina lo sigui pasa.

No ta di awo Sindicato di Polis (SPA) a haci intento di yega na mesa cu gobierno riba problematica serio cu tin den cuerpo policial. Na mas di un ocasion a manifesta, walk out y haci apelacion na e mandatarionan cu tin mester di material y ekipo, cu tin di pone atencion na cierto situacion tumando luga cu ta pone nan salud y siguridad na peliger. Algun di nan ta entre otro edificio na schimmel, bullet proof vest, pepper spay caduca, boots adecua y como tambe vehiculo miho ekipa y adecua pa rescuarda bida di cada polis cu ta subi caya na defensa di e comunidad.

Cu e palabranan di e vice-presidente di SPA por a deduci cu e sentimento cu ta biba na e momento aki den cuerpo policial ta uno tenso y cu debi cu no ta yega na acuerdo pa miho ekipo, como tambe mira na bienestar di caba polis, esaki a yega na e extremo caminda a perde un bida precioso di un polis hoben, debi na vehiculo no adecua pa subi caya cu ne. Asina mes tur dia nan ta duna tur di nan banda pa protege y brinda servicio na pais Aruba. Un perdida lamentabel, cu a sinti cu por a scapa y cu sigur a trece hopi tristesa den henter e cuerpo di polis.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.