Recientemente a tuma luga un evento pa gradici Ed Malone pa su trabao pa e ultimo casi 9 añanan como director pa Norte America di Aruba Tourism Authority (ATA). Durante e evento Minister di Turismo, CEO di A.T.A., CMO di A.T.A. y Ed Malone mes a comparti algun palabra di su trayectoria na Aruba como tambe su pasion pa Aruba.
Den Ed su mesun palabranan: “Mi a bin Aruba pa busca un trabao y mi a haya un hogar.” Su yegada tabata na 1987, ora cu a transferie temporalmente pa Aruba como General Manager di Americana Aruba Beach Resort. Desde e momento ey e tabatin un conexion cu nos isla y e conexion a keda semper. Ed a keda como GM na Americana te 1998 y despues a fungi den diferente rol na hotelnan na Aruba pero tambe como parti di diferente asociacion; entre otro como presidente di AHATA y di e asociacion CHA, den diferente funcion.
Entre 2011 y 2014 Ed tabata miembro tambe di e hunta di supervision di A.T.A.. Na 2014, Ed a bay un biaha mas pa haci un trabao temporalmente, e biaha aki pa A.T.A. mes, door di atende diferente asunto na oficina di ATA na Merca. Na aña 2015 Ed a bira oficialmente e director di ATA Norte America y e tabata oficialmente den e funcion aki te cu 31 di december 2022.
Ed Malone, hunto cu su ekipo di Norte America y e agencianan den e mercado a crea y ahusta strategianan pa atrae bishitantenan di balor halto. Tambe a crea campañanan cu no solamente a yega na e personanan cu tabatin como obhetivo y a logra surpasa metanan stipula, sino cu na mes momento a capta e atencion di otronan den e industria y a logra gana diferente premio pa Aruba.
E echo cu un transferencia pa haci un trabao temporalmente na Aruba casi 36 aña pasa na crea un pasion asina grandi pa nos isla cu ainda ta visibel awe, ta algo remarcabel. Adicionalmente, e echo cu Ed semper a comparti su conocemento y a duna coleganan oportunidad pa siña y crece, ta parti di loke ta hacie un persona aun mas special.
Di parti di e ekipo completo di A.T.A., ta gradici Ed pa kere den Aruba como producto y pa stima nos isla. Nos sa cu den Ed su capitulo nobo, Aruba lo por sigui conta cu su gran apoyo y dedicacion.
