fbpx
January 28, 2023

Marco Berlis (MEP): Marisol y Mansur kier deshaci di e lucha y victoria grandi di nos libertador Betico Croes

Share on Facebook
Share on Whatsapp
0
0
Marco Berlis (MEP): Marisol y Mansur kier deshaci di e lucha y victoria grandi di nos libertador Betico Croes
Marco Berlis (MEP): Marisol y Mansur kier deshaci di e lucha y victoria grandi di nos libertador Betico Croes


Nos por a observa den e aña y mey aki den Parlamento di Aruba, cu nos coleganan den oposicion, Marisol Lopez-Tromp y Miguel Mansur ta uni tercamente pa lucha pa tanto CAFT keda funciona y RAFT keda estableci pa pais Aruba. Durante ruedanan di prensa, comisionnan y reunionnan publico por a constata cu nan ta luchando fuertemente pa Aruba cay bao di un rijkswet, asina confirmando cu Aruba no por goberna su mes y cu mester d Hulanda pa tuma control di nos pais pa un tempo indefini. Nos mester corda si cu ta e mesun Marisol Lopez-Tromp aki tabata e voorzitter di Parlamento y ta esun cu a vota “pro” pa tur e presupuestonan gekonkel di AVP, a aproba un ley pa sigui paga pa un minister cu tabata un sospechoso y den prison, a aproba e maneho desastroso di su lider Mike Eman cu a introduci CAFT pa via di a endeuda nos pais di un forma nunca antes bisto, ta complice pa gobierno di Aruba (AVP) na 2015 a haya un KB, y awor ta haciendo tur loke ta den su poder pa Aruba keda someti bao di e autoridad di Den Haag. 

Hunto cu Miguel Mansur, kende su solucionan pa pais Aruba ta inclui pa kita 1500 ambtenaar per direct, pero prome kier e listanan di nomber di tur ambtenaar pa asina selecciona personalmente tur retiro. Miguel, un homber cu a gaña pueblo cu e no ta bay den reunion publico di presupuesto 2023 pasobra mester consehonan di CAFT y RVA pa haci e cambionan, pero cual CAFT mes a bisa no ta necesario pa su conseho y unda DWJZ a mustra cu e conseho di RVA no tabata necesario. Miguel awor ta pro RAFT, e rijkswet cu ta kita nos autonomia den gran manera. Segun Mansur Aruba no por goberna su mes. Mi ta kere Miguel ta confundi awor cu e ta den e coalicion di AVP, cual e ta sostene hunto cu Marisol ciegamente. Un Miguel cu ta sostene un partido di corupcion comun, cu ta e causa di CAFT, LAFT y KB den e tempo ey y cu a sink nos pais Aruba cu un debe di casi 90% di nos GDP. Miguel, un homber cu apenas ta bibando na Aruba y no a demostra niun empatia y nunca a aporta cu ningun otro solucion pa nos economia sino djis pa manda 1500 tata y mamanan ambtenaar cas. Mañan e ta papia di pobresa na Aruba y e kier manda 1500 mayor di mucha cas y kitanan di trabao. 

Di e forma aki ambos Marisol y Mansur kier deshaci di e lucha y victoria grandi di nos libertador Betico Croes! Marisol y Mansur kier manda Aruba bek den tempo y permiti Hulanda colonisa nos un biaha mas pasobra segun nan Aruba no tin e talento, boluntad ni abilidad pa goberna su mes. Esey ta e forma cu nan ta pensa di Aruba!

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.