fbpx
January 28, 2023

Mervin Wyatt-Ras (AVP): Maneho descabeya di gobierno ta perhudica nos turismo

Share on Facebook
Share on Whatsapp
0
0
Mervin Wyatt-Ras (AVP): Maneho descabeya di gobierno ta perhudica nos turismo
Mervin Wyatt-Ras (AVP): Maneho descabeya di gobierno ta perhudica nos turismo


Dialuna a trata den sala di Parlamento e presupuesto di e fondo di turismo yama Tourism Product Enhacement Fund. Fraccion di AVP a pesar di remarcanan riba e presupuesto a sostene dicho presupuesto. 

A lanta e fondo aki na aña 2010 pa mehora e producto turistico. Intencion ta mehora e calidad di turismo door di inversion den e producto turistico riba diferente tereno, manera medio ambiente, siguridad, infrastructura, atraccion, cultura y herencia cultural. 

Sinembargo por nota durante e ultimo presupuestonan ta uza e medionan pa proyecto cu por ta ehecuta p’e otro ministerio y departamentonan. Ta haci oneigenlijke taken. Ta trece esaki padilanti alabes door di Raad van Advies. 

Segun miembro di fraccion di AVP, parlamentario Mervin Wyatt-Ras, e forma cu minister a reacciona riba conseho di Raad van Advies ta fresco entre otro pa loke ta trata e aspecto financiero di vorderingen en schulden. 

Wyatt-Ras a cuestiona dicon kier pone mas bari di sushi, mientras alabes ta necesario concientisacion. Dicon kier bin cu concientisacion rond reciclahe mientras esaki lo mester cay bou of den cooperacion cu otro departamento. 

Tambe el a elabora encuanto e problema di cacho. E ta trece padilanti cu e ta stima cacho y su partido a entrega e ley pa proteccion di cacho y otro animal. E suma no ta suficiente y otro departamentonan mester por carga nan responsabilidad pa atende cu e proteccion di nos animalnan.

Wyatt-Ras ta haya ademas necesario y urgente pa drecha e careteranan cu e turistanan tin cu core fo’i aeropuerto pa yega nan camber di hotel. Specialmente e area di Bubaliplas. Aki yobida ta causa cu awa di e plas ta core y keda para riba caya y kibra tur e camindanan den vecindario. 

A puntra minister riba su vision a largo plaso y cooperacion cu otro instancia y stakeholder pa mehoracion efectivo di nos producto Aruba. Esaki ta necesario en bista cu nos tin cu concuri cu otro pais den Caribe pa por keda competente den atraccion di turista. 

A pidi p’e cuentanan anual di e añanan 2020-2021 y a enfatisa cu ta necesario pa Parlamento ricibi e relatonan pa haci nan trabou di control di gobierno na un forma efectivo. Gobierno mester contesta e preguntanan di Parlamento y trata Raad van Advies na un forma respetuoso den su reacionnan. 

El a papia tambe di e balor di turismo medico pa aumenta entrada di nos pais y a puntra si a keda cla cu acreditacion. Minister a purba gaña cu Wyatt-Ras a bagatelisa e profesionalnan. Wyatt-Ras a coregi ’den persoonlijk feit’ y den vraagpunt p’e minister stop di gaña, pasobra t’e representantenan di e entidadnan a trece dilanti den Parlamento cu falta acreditacion. P’esey e Parlamentario ta follow up. 

Wyatt-Ras a papia alabes di nos reputacion cu ta un aspecto importante pa nos como producto turistico ta nos reputacion. E ta menciona con vacunagate por afecta esaki. Wyatt-Ras ta menciona cu tin bisa cu ta trata di 3000-4000 vacuna, aunke minister ta bisa ta entre 800-900 vacuna y e ta huy pa su responsabilidad, bisando biaha pasa cu e caso ta cera. P’esey prome cu punta dede riba otro, mester wak su mes. A pidi pa e minister informa tocante e caso aki.  

Finalmente e Parlamentario a expresa su preocupacion p’e confiansa den nos pais y influencia riba nos hendenan y turismo door di e forma con e gobierno aki, manera fli sin rabo, ta traha. Tambe e forma con e minister presidente, kende no por mira un pen, ta firma continuamente pa corta garganta di nos pueblo y tin nos pueblo na rudia. El a firma e landspakketten y asina bay di acuerdo cu lo bin un ley di COHO Y RAft, mientras cu awo cu COHO ta “zogenaamd” van tafel geveegd lo e firma un “onderlinge regeling”. Aki atrobe e ta bay compromete nos pais cu mas medida. 

Ya caba door di tur medida cu a tuma door cu e ministro presidente aki a palabra esakinan cu Hulanda sin consulta ni cu gremio ni cu pueblo, nos hendenan ta sintiendo esakinan. Nos ciudadanonan no por paga nan medicina, no por paga nan cuentanan y no por pone ni pan riba mesa di nan famia. 

Consecuencia ta e.o. aumento di criminalidad, problema social y di salud mental. Con nos pueblo por ta contento e ora pa ricibi bishita di turista? Con happy nos pueblo ta? Wyatt-Ras ta pidi pa duna atencion n’e aspecto aki y refleha, e.o. pa medio di investigacion y seminario.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.