ORANJESTAD – Mehoracion di producto turistico ta sumamente importante y kinan ta unda e maneho nacional di turismo tin un rol clave. Esey tabata e pensamento di e oficina di turismo (ATA) durante un presentacion na prensa diaranson mainta. Segun e oficina, pa 2023 lo sigui move den e bon direccion riba e tema aki. E oficina ta bisa tambe cu mester gradici Ministerio di Turismo y Gobierno di Aruba cu a institui e comicion di Infra pa duna e tema aki e atencion debido. E comision aki ta consisti di Ministerio di Turismo, A.T.A., DOW, DIP, DNM ora ta necesario y TPEF. E comision aki sigur ta importante pa a logra y sigui logra hopi proyecto.
PROYECTONAN IMPORTANTE
Proyectonan y inversionnan den producto ta importante paso ta yuda mehora e “value for money”, pues e balor pa e placa cu e bishitante ta gasta. Mester keda realisa cu prijs eleva mester bai man den man cu un subida di e balor pa placa cu ta brinda. Esaki ta bou di presion y ta rekeri atencion.
BISHITANTE DISPUESTO PA PAGA HOPI
Aruba, A.T.A. y socionan a sa di demonstra cu e bishitante ta dispuesto pa paga un prijs mas halto pa un vacacion pa Aruba. E bishitante tabata dispuesto pa haci esaki mas ainda despues di e pandemia, despues di ta anhela pa e normalidad aki y pa un biahe.
BIDA NORMAL
Mientras bida lo sigui normalisa e consumidor, mescos cu nos na Aruba ta mira, por lo general lo mira tambe un subida den ‘costo di bida’. Mester corda cu te hasta esun cu poder di compra mas halto ta pone atencion na nivel di costo.
ATREA TURISTA CU MAS PODER
A.T.A. lo sigui enfoca riba atraccion di e turista cu mas poder di compra.
Esaki kiermen cu nos ta pisca den awa cu menos pisca, pasobra ta tanto hende tin cu cierto cantidad di placa den cada mercado. Nos ta atrae bishitantenan cu lo ta sigui ta mas y mas exigente y kier mas balor pa nan placa. Segun costo di un vacacion pa Aruba ta subi, esaki ta trece cu ne cu e costo pa atrae cada bishitante tambe lo subi. Esaki ta pasobra, manera cualkier otro producto, mientras mas caro bo ta, mas chikito e pool ta bira di esunnan cu por paga p’e, den e caso aki, un vacacion na Aruba. Mas dificil ta pa yega na e bishitantenan desea, y mas exclusivo bo mester posiciona bo mes como marca pa capta nan atencion meymey di hopi otro cu tambe kier mesun cos!
DESTINACION TURISTICO
Como parti di A.T.A. su tarea di mercadea y maneha Aruba como destino turistico, tin diferente proyecto cu A.T.A. ta inverti aden. Ta trata aki di proyectonan tanto di mehoracion di producto como tambe proyectonan di desaroyo di producto. E proyectonan aki ta alinea cu e maneho nacional di turismo. Asina por bisa cu di A.T.A. su gastonan pa mercadeo, entre 5% y 10% ta bay na nos producto turistico y e restante ta bay na mercadeo internacional.
2023
Den 2023 lo continua cu diferente proyecto infrastructural entre otro na Hooiberg, Baby Beach y Rodgers Beach, mantencion y renovacion di palapa y gazebonan na diferente beach, como tambe proyectonan manera Mountain Bike trails y e extension di e QR FIT den otro areanan.
