ORANJESTAD – Sindicatonan SADA, SEPPA, SIMAR, SPA y TOPA kier claridad di gobierno di Aruba si enberdad ta elimina e resto di recorte salarial di 7.6%, y a duna nan (gobierno) te otro siman dialuna atardi 3 or, (23 di januari 2023) pa duna un clarificacion sino ta hiba gobierno Corte. E sindicatonan ta mustra den un carta cu nan a manda awe pa gobierno, cu nan a keda sorprendi pa declaracion di gobierno durante un conferencia di prensa recien, unda cu gobierno a informa cu no ta sigur ainda cu lo para e recorte menciona.
CONTRA PALABRACION Y PUBLICACION
E sindicatonan den e carta a recorda gobierno cu den publicacion di ley na December ultimo ta para cu e ley cu ta stipula e recorte, ta vence entrante 1 di januari 2023. Esaki lo mester a conta pa tanto ambtenaar y ministernan. Pero gobierno di Aruba a bisa cu nan ta pendiente decision di conseho di minister di Reino fin di luna awor, si esaki en berdad ta bira un hecho. Nan (sindicatonan) ta considera esaki como algo insolito y inexplicable legalmente. Y ta papia aki di ‘mal gobernacion’. Sindicatonan ta recorda gobierno cu nan mes (esta gobierno) ta señala cada bez cu e finanza di Aruba ta den recuperacion y cu tin medionan financiero disponible y cu a base di esy, a tuma e decision cu a keda publica.
CORTE
Pero, mirando cu no tin claridad, sindicatonan a menasa di hiba gobierno Corte, si no cumpli cu e promesa haci y duna claridad. Lesa e carta AKI.
