ORANJESTAD – Un total di 5 sindicato (SADA, TOPA, SIMAR, SPA, FTA, y SEPPA) a pidi Gobierno di Aruba diabierna atardi pa medio di un carta, pa para of suspende e asina yama sistema di prestacion, conoci como ‘ Prestatiebeoordeling’ introduci pa ley entrante 1 di januari ultimo (2023). Nan ta alega cu tabata den interes di tur partido pa por implementa un sistema corecto, pa tin un consensus entre tur partido riba tur punto esencial, prome cu introduci esaki. “Esaki pa evita cu e sistema resulta un caso morto’, e sindicatonan ta alega den e carta.
Nan ta referi na un carta cu nan a manda for di augustus aña pasa, pa pospone e introduccion di e sistema menciona. Y despues net prome cu fin di aña atrobe. Na ambos ocacion gobierno a contesta cu no ta mira e motibo pa esaki sosode.
Ademas, e sindicatonan ta mustra cu gobierno a core introduci e sistema pa tene Hulanda contento como un di e exigencianan di gobierno Hulandes, sin cu e organisacion gubernamental tabata cla pa implementa esaki. Mientras cu nan (sindicatonan) a keda envolvi den comienso di e proceso, nan ta conclui cu mirando e situacion, cu ta por nada nan envolvimento tabata.
Prome cu nan (sindicatonan) resorta na pasonan legal, e sindicatonan kier un biaha mas duna gobierno chens pa para e introduccion y a duna gobierno ultimatum te dia 27 di januari proximo sino ta bay corte y laga hues dicidi esaki.
