fbpx
January 28, 2023

Iglesia Cristian recolectando firma: Matrimonio di mesun sexo por habri porta pa matrimonio cu menor di edad

Share on Facebook
Share on Whatsapp
0
0
Iglesia Cristian recolectando firma: Matrimonio di mesun sexo por habri porta pa matrimonio cu menor di edad
Iglesia Cristian recolectando firma: Matrimonio di mesun sexo por habri porta pa matrimonio cu menor di edad


Iglesia Cristian Odres Nuevos a uni diasabra atardi p’un accion di firma. Durante oranan di atardi por a mira nan cu e borchi “Nos kier Cassatie”. E accion di firma aki ta pa pidi Gobierno di Aruba pa bay Cassatie pa loke ta trata e matrimonio p’e parehanan di mesun sexo. 

Roberto Gracia di Odres Nuevos a cuminsa bisando cu mas o menos 30 iglesia a subi caya diasabra pa colecta firma. Nan meta ta pa logra haya por lo menos 20 mil firma p’asina pidi Gobierno pa bay Cassatie. 

“Nos kier pa e veredicto aki no bay door pa Aruba”, asina Gracia a comenta. El a sigui bisa cu Corsou a bay casacion y e iglesianan kier anima Gobierno di Aruba pa bay cassatie. 

No ta un dia so!

Roberto Gracia di Odres Nuevos a continua bisando cu den e rato cu nan tabata para den cercania di Acropolis Plaza nan a logra colecta 200 firma.  E ta positivo cu gran parti di comunidad no kier pa personanan di mesun sexo haya e derecho pa casa. Segun Gracia “mayoria di e comunidad no kier”. Tin mas iglesia para na Dakota, St. Cruz, Oranjestad y San Nicolas. Siman pasa nan a colecta varios firma caba y otro siman nan lo bolbe subi caya cu e meta di yega 20 mil firma. Nan no ta obliga ningun hende pero ta pidi pa esunnan cu tin mesun pensamento cu nan, pa pasa firma. 

Yega basha firma pa stop casamento di mesun sexo

Iglesia Odres Nuevos ta colecta firma contra casamento di mesun sexo

Posted by 24ora on Saturday, January 21, 2023

Deadline ta na maart.

Minister-president a laga sa cu e lo tin di haci un estudio pero tambe tende for di e consehonan cu ta ricibi. A pesar di estudio, e iglesianan Cristian lo sigui cu nan pensamento. Roberto Gracia a comenta cu pa nan esaki ta bay leu cu djis algo religioso, pa nan e ta trata di principio y naturalesa. E naturalesa, segun Gracia, ta bisa nos kico ta klop y kico no. Nan kier proteha matrimonio y famia. 

Mas cu casamento di mesun sexo

Segun Gracia di Odres Nuevos: “awo ta matrimonio di mesun sexo despues lo bin mas cos y nos kier proteha matrimonio y famia”. El a splica cu nan a tuma nota cu na dos scol a cuminsa drenta sin cu a aproba e ley… “imagina bo si e ley wordo aproba”, el a comenta. Iglesia Cristian ta kere cu nan lo logra e cantidad di firma y convence Gobierno cu mester bay cassatie pa por haya un veredicto diferente. 

Con ta aporta

Si ta e caso cu bo ta sinti cu bo kier colabora cu un firma bo por pasa y duna nomber, fam y adres hunto cu bo firma. Asina ta demostra cu cada firma ta di un hende diferente. 

Acumula firma 

Despues di colecta firma, e iglesianan tin plan pa fin di luna entrega tur firma y un manifiesto na Gobierno. 

Mensahe final

Como mensahe final, Roberto Gracia, a informa cu como iglesia nan tin un deber pa proteha e famia. El a enfatisa cu no ta bringando cu hende pasobra cada ken por scoge kico nan kier pero sin impone esaki den un ley. 

Ley di matrimonio ta algo sagrado y nan no kier pa ningun hende haci cambio. Nan ta sinti cu si habri caminda matrimonio di mesun sexo, despues lo habri pa matrimonio cu menor di edad por ehempel. 

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.