E tin 10 aña luchando pisa cu su salud pa a purba combati cancer. El a gana varios bataya den e proceso, tanto na Aruba como den exterio, pero finalmente a perde e guera awe merdia. Despues di algun dia hopi malo interna den hospital, awe polis Rigoberto Tromp a bay sosega.
“Rigo” a bay laga atras su casa Esther y su dos yiunan Reginald y Derwin. E ta naci dia 9 di september 1961 pues tabatin 61 aña di edad y lo a traha cuater aña mas como polis. Su ultimo funcion tabata Sub Inspector primera clase y tabata “planner” na ward’i polis di Oranjestad.
Rigo Tromp a drenta den servicio di Gobierno di Antias Hulandes dia 16 di november 1982 den espera pa drenta scol pa polis. Na final di juni 1983 el a cuminsa cu e ‘opleiding’ pa bira polis den e Scol pa Polis situa e tempo ey den Isaac Wagemakerstraat, unda awe ta IPA. E tempo ey e aspirantenan tabata interna y diaranson y weekend so por a bay cas, cu excepcion di e “adspirant van de week”. Despues cu nan a termina e opleiding, a parti nan na diferente warda di polis.
Dia 10 di november 1984 nan a subi caya. Rigoberto Tromp, Ivo Kingsale, Marcel Maduro, Eddy Ras y Eric Ras a cuminsa traha na ward’i polis Oranjestad. Un klas masha uni, cu na november ultimo a celebra 40 aña di servicio.
E reto den e caso aki ta, cu mescos cu otronan, ta sospecha cu e “schimmel” den e ward’i polis di Playa por ta un posibel causa of a enduci e cancer na garganta. Tin mas polis cu ta traha eyden cu tin e mesun reto, pero Rigo ta bira e prome pa perde e guera, locual awor ta causando hopi tristesa y emocion halto memey di e polisnan.
Na famia Tromp, na su coleganan y tur su amigonan, specialmente di e deporte di tennis, hopi forsa den e momentonan dificil aki. Ta di dos polis den funcion cu ta perde nan bida e ultimo dianan aki, pa cual Cuerpo Policial Aruba lo mester dera dos colega e siman aki. Ambos lo haya un entiero oficial.
