Team BigShow ta titula CAMPEON den e torneo di baseball infantil FABB 2023 na Corsou. Segun coach Elwin Rincones, nan tin basta tempo ta bay e campeonato aki. Semper e ta un pre-campeonato na Corsou prome cu Little League cuminsa.
Segun Rincones, tur team na Corsou ta participando, ya cu e ta un competencia di tur team. Una bes hinca eyden, e ta manera un challenge unda e team ta para. Hopi biaha ta cay net cortico pa por a yega final, pasobra e competencia ta fuerte y bon.
Na Corsou e wega di Little League ta hopi conoci y sigui, pasobra hopi hende ta mira wega riba veld.
E biaha aki a prepara e muchanan na Aruba riba nan miho capacidad. A bay Corsou y a haci un tremendo trabao, teniendo e weganan cortico.
E pitchernan a tira bon y e bateadonan a dal hit oportuno. A haci hopi cos pa sali y a gana e weganan pa pasa p’e final y finalmente a gana Montaña Abao cu e score di 4-3 den un tremendo partido y cu un stadion yen yen, cu bon ambiente.
Rincones a indica cu e muchanan a pasa hopi bon e aña aki. Un total di 26 hungado a bay, dos team di 13. Tabatin un staff di mas of menos 10 coach y por lo menos 50 mayor cu a traha hunto cu e coachnan y pa sostene nan yiu y nietonan cu a bay participa den e campeonato.
Minister Endy Croes, como titular di deporte a bin ricibi e organisacion di Stars, cu dos team di BigShow. E ta sigui bisa cu den e torneo aki tabatin 12 ekipo cu a participa den e torneo di FAAB. Tin di compronde cu den tur e ekiponan aki, e ekipo di Aruba a sobresali den e torneo aki y a titula campeon diadomingo na Corsou y dialuna a regresa Aruba.
Mas cu claro como mandatario di deporte, ta pa tanten cu e schedule ta permiti y hopi biaha ta traha luga den e schedule, pa por bin aeropuerto, mustra e aprecio cu tin pa nan, p’e trabao cu nan ta haci.
Croes a bin tambe for di e mundo den deporte y sa kico ta nifica ora cu bringa p’e bandera. Y mas bunita ta ora cu e mandatarionan ta topa cu e muchanan na aeropuerto, pa reconoce e trabao y e balor grandi di locual nan ta nifica n’e edad aki.
Minister Croes a desea e muchanan un pabien, di parti di gobierno, como tambe n’e organisacion Stars, n’e coachnan, e mayornan cu a biaha y a duna sosten, ya cu no ta facil ta pa biaha cu mucha.
Pero p’e trabao bunita cu e atletanan aki na un edad hoben a desplega na Corsou, ta kit’e pechi pa nan, yamando nan bonbini na Aruba, danki y hopi pabien, e minister a bisa por ultimo.
