ORANJESTAD – Ex politico Allan Howell (50) por haya un castigo di prison di 2 aña si huez haye culpable di e acusacion cu tin contra dje di malversacion di fondo den e caso Diamanta, cu ta trata pues malversacion di fondo di fundacion di partido politico POR. Hunto cune tin e persona J. van Putten (62) cu tabata tesorera di e fundacion. Segun Fiscal, Howell ta culpabel di malversacion di placanan di partido POR y tambe falsificacion di recibonan y ta haya cu Fiscal Van Putten a wordo usaden e caso aki.
SUMA
E suma cu Howell ta wordo acusa di a malversa, ta bastante, unda cu a menciona e suma di 197.404 florin mientras cu van Putten tambe lo a malversa, pero den su caso, algo mas di 100 mil florin. E caso aki lo a sosode entre 2017 y 2021 ora cu Howell tabata den funcion di Parlamentario y presidente di e fundacion di e partido y v Putten e tesorera.
TESTIGO
Durante e caso, hues kier a scucha Van Putten como testigo den caso Howell relaciona cu e factura di Fondo Advisory. Hues a pidi Van Putten pa confirma si a manda e-mail pa Howell cu e factura su fecha Oct. 2022 pero cu mester ta Oct. 2019. Aki van Putten a confirma esey y a bisa cu despues cu Howell a mand’e e mail bek, e la manda esey pa accountant.
MALVERSA PLACA DI PARTIDO
Segun Fiscal, Howell cu ayudo di Van Putten a malversacion 197.104 mil florin. E forma di haci esaki tabata di manda placa Placa via facturanan falso pa cuenta priva di Howell. Esaki ta malversacion di placanan di partido POR. Den e investigacion di Landsrecherche, a usa e filosofia “follow the money”. For di Gobierno a haya casi 500 mil florin pa fraccion di POR pa por cubri su gastonan.Segun Fiscal, Howell lo a laga pasa trasaccion di placa di partido riba su cuenta personal. Ademas, durante investigacion Howell a pone su abogado facilita un cantidad di facturanan cu ta falso. Y a mustra cu landsrecherche durante investigacion no a haya ningun di e facturanan aki.
Tambe fiscal a splica cu Fondo Advisory a haya algo mas di 65 mil florin. Esaki ta placanan cu Howell a pidi e Stichting pa paga. Segun Fiscal, e factura di pago aki lota falso, pasobra Fondo Advisory simplemente no ta existi y no por a haya nada na DIMP (Departamento di Impuesto) riba esaki. A splica cu ta difunto tata di Howell tabata esun tras di Fondo Advisory pero no ta un hurista manera ta para den documentonan. Fiscal a sigui bisac u no a haya ningun factura na e cas. Tambe Fiscal a mustra cu segun Howell e tabata paga su tata pero aki tampoco no por a haya ningun prueba di esaki. Y segun Fiscal, e factura di pago a wordo traha despues cu e tata di Howell a fayece.
INSTRUCCION
Fiscal a sigui bisa tambe cu riba tabata riba instruccion di Howell, cu Van Putten a traha un factura di 18 mil florin pa ‘Blue is Foundation’. E placa aki a usa pa paga trahador di fraccion R.L. No tin ningun indicacion na kende e placa realmente a bay.
E ARUBIANO
Tambe a bin dilanti segun fiscal cu di e medio E Arubiano, e dama F.B. lo a haci trabounan pa partido POR. Aki lo tin pagonan cu lo a tuma lugar pero segun F.B. ta solamente 10 mil florin a haya y no e mas cu 100 mil florin manera facturanan ta mustra. Pues, aki tin un diferencia di mas cu 90 mil florin. Despues Howell a presenta carta di E Arubiano cu ta bisa cu a haya 22 mil florin for di POR. Segun Fiscal, esaki tabata pa demostra cu Howell a haci pagonan na E Arubiano. F.B. a bisa cu ta despues cu Howell a wordo persigui legalmente, cu el lo a acerca F.B. pa firma e carta. Fiscal a bisa cu e no tin duda den declaracioin di F.B, mientras cu Howell ta bisa cu e la paga F.B for di su placa, pero Fiscal no ta kere esaki.
PRUEBA FALSIFICACION
Fiscal a sigui bisa cu Howell lo tabata coy placa di POR pa su propio uso y cu tabatin falsificacion di documentonan tumando lugar. Sinembargo mester bisa cu den e caso di E Arubiano, el a pidi pa declara Howell liber. Fiscal a bisa tambe cu F.B. a reconoce cu el a traha e facturanan. Pa sospechoso Van Putten, Fiscal a sigui bisa cu e ta haya cu e la wordo usa. E caso Sinterklaas, unda a bisa cu Van Putten lo haya 1 mil florin di placa pa Bashi Premie y Howell 10 mil florin, ta considera esaki algo den su contra.
ABUSO DI CONFIANSA
Segun Fiscal, Howell a abusa di confiansa di comunidad y como tal mester baha cu man duro riba e caso aki mirando cu corupcion ta inaceptabel.
CASTIGO
Fiscal a exigi 24 luna di prison, kitando e tempo cu e tabata sera pa Howell, Pa Van Putten, Fiscal a exigi castigo di 200 ora di trabao pa comunidad of 100 dia sera. Ademas Fiscal a exigi castigo condicional di 3 luna di prison cu 3 aña di prueba.
CONFISCA PLACA DI HOWELL
MIentrastanto a sali na cla cu tin beslag poni riba cuenta di banco di Howell di algo mas di 49 mil florin y a pidi pa esaki keda confisca por lo pronto y tambe a exigi un multa igual na e placa confisca. Diabierna mainta abogadonan di e sospechosonan lo hiba nan defensa. .
