Diahuebs mainta a tuma luga tratamento di e caso penal conoci como Diamanta. Tin dos acusado den e investigacion aki, esta Alan Howell (Lider y presidente di POR) y Jacky van Putten (tesorero di e stichting POR). Ta papia di un malversacion cu ta yega casi 200 mil florin. A transferi placa for di cuenta di e fundacion di POR, cu ta haya mensualmente un suma pa e fraccion den Parlamento, pa cuenta personal di Howell y a saca sumanan grandi di placa cash cu a bay pa Howell. Den e periodo cu ta papia di dje e fundacion a haya casi 500 mil florin y a acusa nan di malversa casi 200 mil florin.
Pa Ministerio Publico, Howell no por a proba cu e personalmente a paga tur e gastonan haci y pa cual a tuma su pago ora cu e fundacion tabatin placa. Ta papia aki di pago cu el a haci na “E Arubiano” pa cobertura di media y otro trabounan; salario di un fractie medewerker cu Partido POR tabata paga, adelantando esaki te ora cu e fundacion haya e placa for di presupuesto di Parlamento y tambe pago haci na un compania di consultancy cu tabata pertenece na su tata (kende tabata traha como su consehero) pero cu riba papel no tabata existi.
Solamente fiscal a hiba palabra diahuebs mientras cu abogadonan lo hiba palabra diabierna mainta 11’or ora cu tratamento di e caso sigui.
Fiscal a pidi pa Alan Howell un castigo di 2 aña y verbeurt un suma di casi 50 florin cu tin riba un cuenta di spaar di dje. Pa van Putten, a pidi 200 ora di trabou pa comunidad y 3 luna condicional cu tres aña di prueba, kitando e tempo cu el a pasa den detencion preventivo.
Den edicion di TREMPAN lo tin un relato mas amplio di tratamento di e caso.
