Tabata net prome cu 11:00 am cu a surgi un fayo den central di produccion di coriente na Water en Energie Bedrijf (WEB) Aruba N.V. Mientras cu ainda e tecniconan no a duna motibo di e fayo, cu a paralisa henter economia di nos pais, a informa si cu pa 2:18 pm a reestablece suministro regular di coriente atrobe rond di nos isla.
Aña pasa WEB a confronta problema cu a conduci na un blackout na cinco ocasion, un record den historia di e compania nacional di produccion di awa y coriente. Di un banda ta anuncia inversionnan cuantioso regularmente pero tur e inversionnan aki den tecnologia moderno ainda no ta traduci den un suministro di coriente stabiel. Esaki ta pone cu comunidad ta disgusta y comercio ta haya sla tras di sla door di no por bende ni opera.
Minister Glenbert Croes ta responsabel politicamente pa maneho di WEB, pero legalmente e director, Alfredo Koolman, ta responsabilisa su mes na Goswino (Gos) Oduber cu ta presidente di e Hunta di Supervision. Riba WEB tin e compania Utilities Aruba N.V. cu Anthony (Ton) Rojer como director y Robert Maduro (ex-parlamentario di MEP) como presidente di e Hunta di Supervision. Tur di nan lo tin cuenta di duna na Minister di Energia, Glenbert Croes, cu mester responde na e pueblo votado.
Pa turismo e interupcion aki tin consecuencia pasobra a stroba operacion na aeropuerto, hotelnan cu yen di inconveniencia, restaurant cu no por a funciona net den ora di “lunch”.
Pa colmo, net awe tin sorteo di Lotto pa Deporte cu un premio di Afl. 2.175.000,=. Interupcion di coriente a costa e fundacion tres ora importante di benta.
Conocedonan di e problema a sigura cu tin un reto structural den e planta nobo di WEB. Y vu tanten cu no descubrie, no por corigie y consecuentemente e lo sigui causa problema. Maske cu awendia, e ekiponan nobo y moderno ta causa cu ta lanta e planta masha lihe bek despues di blackout, toch e chens pa e planta completo bay plat ta masha facil y ta sosode cu demasiado frecuencia. Y pio ainda, sin cu nunca WEB ta sali duna un splicacion di e fayo y sin consecuencia laboral pa esun responsabel tampoco!
