Conseho di Ministro di Reino, como tambe Conseho di Ministro di Hulanda, asina leu cu ta concerni Hulanda Caribense, a nombra drs. Lidewijde Ongering como presidente nobo di e tres Colegionan di supervision financiero (Cft) entrante dia prome di februari 2023. Di e manera aki e ta reemplasa prof. dr. Raymond Gradus, kende tabata presidente di e Colegionan for di dia 1e. di juli 2017.
Diabierna dia 27 di januari 2023 a nombra Lidewijde Ongering como e presidente nobo di e tres Colegionan di supervision financiero entrante dia prome di februari 2023. E tin un trayectorio largo di servicio den un gran cantidad di departamento na Den Haag, entre nan esunnan di Relacion Interno y Relacion den Reino, Infrastructura y Maneho di Awa, y Asunto Economico y Clima. Den e delaster dos departamentonan aki el a eherce e funcion di secretario general. Den Ministerio di Salud Publico, Bienestar y Deporte el a eherce durante su carera e funcion di Director di Asunto Financiero y Economico.
Lidewijde Ongering: “Mi deseo ta pa hunto nos enfrenta e retonan for di un perspectiva conhunto. E retonan ey, pa lo demas, pa un gran parti ta masha reconocibel pa mi. Cft ta supervisa e presupuestonan. Despues di algun aña financieramente dificil, awor e enfoke ta riba recuperacion y realisacion di un crecemento economico financieramente responsabel y sostenibel. Den mi funcion nobo di presidente di Cft lo mi ocupa mi mes masha seriamente cu esey tambe.”
E ta reemplasa Raymond Gradus, kende tabata Presidente di Colegio di supervision financiero di Corsou y Sint Maarten, di Colegio di supervision financiero di Aruba y di Colegio di supervision financiero di Boneiro, Sint Eustatius y Saba durante mas di cinco aña y mey. Prof. Gradus ta mira atras na un periodo intensivo y fructifero di cooperacion cu e paisnan y cu e entidadnan publico, un periodo den cual diferente gran reto a presenta, manera e horcannan Irma y Maria y e pandemia di Covid-19. Raymond Gradus a recopila su reflexionnan den forma di buki y e lo presenta esey na Vice-Presidente di Conseho di Estado, Señor Thom de Graaf, dia 31 di januari.
Leyenda
drs. Lidewijde Ongering ta reemplasa Raymond Gradus como Presidente di Colegio di supervision financiero di Corsou y Sint Maarten, di Colegio di supervision financiero di Aruba y di Colegio di supervision financiero di Boneiro, Sint Eustatius y Saba.
