ORANJESTAD – No tin nada di malversacion of falsificacion di documento! Esey tabata parti di defensa diabierna mainta di abogado di e ex politico Alan Howell den e caso Diamante. Segun e abogado Doris Canwood, e no ta comparti punto di bista di Fiscal. Segun Canwood, Howell no a haci nada di malversacion, falsificacion di documento. Ademas e ta mustra cu na 2020, Financial Intense Unit (FIU) di banco tabata sospecha cu placanan dedica na fraccion di POR, un gran parti tabata bay riba cuenta di Howell.
E abogado a mustra cu conforme ley, tur fraccion den Parlamento ta haya casi 500 mil florin di Gobierno pa cubri nan gastonan y cu un fundacion di partido no ta permiti di haci pagonan cu e placa aki. Ta cada fraccion ta dicidi con ta usa e placanan y ta instui fundacion pa haci pagonan. Den e caso aki, esey tambe a sosode cu partido POR. E abogado a sigui pa splica Hues tur e sumanan cu a wordo paga.
A HAYA PLACA
E abogado a sigui pa mustra cu e 50 mil florin cu e fundacion a parti pa ex colega di partido Lopez Tromp y su cliente Howell ta pa nan cubri nan gastonan. Entre nan, un suma di 25 mil a bay pa e ruman muher di Lopez Tromp cu tabata encarga cu publicidad pa e partido y Howell a paga e medio di prensa E Arubiano. Tambe e abogado a mustra riba facturanan cu a paga e dama R.L. cu tabata traha cu fraccion POR. Tambe tin facturanan cu a paga E Arubiano.
JOKE
Tambe a trata un asunto cu a wordo tuma na serio, siendo cu despues a resulta cu tabata un mal chiste, esta e asunto di Sinterklaas, caminda Van Putten lo a puntra Howell si tin placa pa e Bashi Premie y unda cu Howell lo a bisa den joke cu Sinterklaas a dicidi cu Van Putten ta haya 1 mil y Howell 10 mil florin. Sinembargo, esey tabata un joke entre nan, pues nada malo a pasa eynan aunke cu e por parce otro.
E abogado a cuestiona dado momento, pakico Ministerio Publico ta persigui Howell y no a opta pa persigui e colega ex minister Lopez Tromp, cu tambe a paga familiar (ruman:red) pa haci trabaonan. A sigui pa mustra cu tin un cantidad di factura cu a paga e persona di inicial F.B. di E Arubiano y cu unda F.B. a admiti di a haya e pagonan y cu F.B. no tabata traha cu recibo.
MALVERSACION OF NO
Abogado di Howell a sigura tambe cu e acusacion di malversacion, no tabata al caso. Aki e la sigui pa presenta dos rapport di dos compania di taccountant den Corte, cu ta mustra cu tur e placanan cu Howell a instrui Van Putten pa traspasa, a wordo paga y no cu a Howell lo a usa placanan pa su mes. E abogado a mustra cu Howell tabata paga su tata di Fondo Advisory y despues e tata a traha un factura pa asina e fundacion paga Howell bek. Pues tur e placanan cu Howell a paga, segun investigacion di accountant ta cuadra cu otro.
FACTURANAN FALSO
Pa loke ta e acusacion di facturanan falso, na opinion di mr. Canwood, esaki tampoco ta al caso. E abogado a menciona sentencianan cu ta mustra cu locual ta acusa Howell di falsifica factura no ta cuadra. El a mustra cu placa cu a manda pa Who is Love, no ta un persona sino ta slogan cu partido POR tabata usa durante campaña pa eleccion. E abogado a bisa Hues, no ta Howell tabata cambia facturanan di E Arubiano, ta e dama F.B. di E Arubiano, tabata drecha fayonan cu e tabata pone riba factura y despues ta manda e fracturanan drecha pa Howell y Howell tabata manda esakinan pa Van Putten. Abogado ta haya cu mester declara Howell liber.
El a bisa cu e ta comparti punto di bista di Fiscal cu mester declara Howell liber di falsificacion di facturanan di E Arubiano. Na opinion di mr. Canwood, Landsrecherche a haya e facturanan cambia serca F.B. y no serca Howell. E ta haya cu no por kere declaracionnan di F.B. For di combersacionnan whatsapp por mira bon cla con hopi Howell y F.B. tabata comunica cu otro y no ta manera Fiscal ta pinta e asunto cu Howell lo tabata forza F.B. pa traha factura. Pa loke ta confisca algo mas di 49 mil florin di cuenta di spaar di Howell, mr. Canwood ta haya cu esaki ta inhusto y a pidi Hues pa instrui Fiscal pa debolbe e placanan.
ULTIMO PALABRA
Fuera di ta categorisa su asunto como uno di persecucion politico, Alan Howell den e parti di ultimo palabra, a splica cu el a nenga di bay riba lista MEP, contrario di loke tabata specula. Segun Howell, Ministerio Publico a cuminsa investigacion a base di e 50 mil florin cu el a haya paga door di a paga su tata. Howell ta haya sinembargo cu ta hopi tristo cu como lider di POR, e no por a splica pueblo kico a pasa. Howell ta pensa cu Gobierno y Ministerio Publico a haci’e hopi daño sin motibo. El a bisa cu e radionan liga na e Gobierno tabata duna informacion di investigacion di malversacion siendo cu e mes no tabata sa. E ora ey Howell a tene un conferencia pa bisa cu e placa ta un pago bek. Huez a cera e caso y lo dicta sentencia dia 24 di maart proximo. .
