ORANJESTAD – Segun e sospechoso den caso Diamante, J. van Putten, hendenan cu e tabata confia, a usele y awor e ta mal para. Diabierna mainta, Corte a trata su defensa, hunto cu e defensa d e ex politico Alan Howell.
COMPLICE DI MALVERSACION
Van Putten su abogado Zuhaila Arendsz Marchena, ta sigura cu su cliente den calidad di tesorero di fundacion di POR a haci trasaccionnan di placa pero a desmenti categoricamente cu e la malversa placa . Arendsz no ta haya cu Van Putten ta complice tampoco. Segun splicacion di e abogado, e la bisa cu Van Putten tabata haci trasaccionnan pa fraccion di partido POR y cu e fundacion no tin nada di bisa con esaki mester sosode. El a mustra cu ex colega di partido Lopez Tromp mes a bisa cu e fundacion ta haci pagonan riba instruccion di fraccion POR. E abogado a sigui pa splica cu Lopez Tromp mes a haya 25 mil florin paga y despues 5 mil pa atende su asuntonan. Van Putten su abogado a sigui splica cu su e (van Putten) tabata confia cu tanto Lopez Tromp como Howell tabata controla tur cos y instrui Van Putten pa paga. Esaki pasobra Van Putten no tin conocemento como tesorero. Segun e abogado nunca Van Putten tabata duda den nan. El a mustra cu ni e accountant di POR a hala atencion cu cosnan no tabata bon.
CONOCEMENTO DI VAN PUTTEN
Segun Arendsz Marchena, Van Putten pa falta di conocemento tabata haci cosnan cu Howell tabata bis’e si kico ta corecto of no. Aki a splica cu e la lanta 50 mil florin pa parti pa Lopez Tromp y Howell. Tanto Lopez Tromp como Howell a confirma esaki segun e abogado y e suma tabata pa nan cubri nan gastonan. Pa loke ta E Arubiano, Van Putten tabata mira publicacionnan y tabata kere cu tur cos tabata bon y e abogado a bisa cu Van Putten a haci e transferencia di placa pa a paga ruman di Lopez Tromp y tambe e dama R.L. cu tabata traha pa fraccion POR. Van Putten tabata haci e pagonan cu Howell tabata pidi.
CLIENTE NO A FALSIFICA
Arendsz a desmenti categoricamente cu Van Putten lo a falsifica recibonan. El a bisa cu ta ariba instruccion di Howell, Van Putten a traha recibo ya cu e computer di Howell lo a daña. Ademas a sigura cu su cliente Van Putten no a haya ningun cen manera Fiscal ta bisa. E abogado mr. Arendsz Marchena a bisa Hues cu awor Van Putten a bin bey cu e mester a paga mas tino riba loke e tabata haci y cu e ta haya cu mester declara Van Putten liber di tur acusacion.
BOU TRATAMENTO
Segun e abogado, su cliente ta bou tratamento di psicologo desde November 2021, pasobra e ta den un trauma.
A CONFIA HENDE PERO A WORDO USA
Durante e parti di ultimo palabra, Van Putten a bisa Hues cu e ta sinti cu el a wordo usa. El a bisa cu el a pone asina hopi confianza den Howell y Lopez Tromp y awor e ta realiza cu el a wordo usa. Hues a cera e caso y ta dicta sentencia dia 24 Maart 2023.
