Rey Willem Alexander, Reina Maxima y Princesa Amalia a yega Boneiro, aki ta caminda nan bishita p’e islanan di Caribe ta cuminsa. Gezaghebber Edison Rijna a duna e famia real un bonbini na e isla.
E famia lo keda Boneiro te cu dialuna mainta, ey nan lo bishita e asina yama casnan di esclavo y algun otro luga mas. N’e casnan ey, e esclavonan cu mester a traha den e saliñanan tabata drumi. A construi e casitanan den aña 1850 y nan ta simbolisa e historia di sclavitud na e isla.
Atencion pa e historia di sclavitud
Despues di nan bishita na Boneiro, Willem-Alexander, Amalia y Maxima lo bishita Aruba, Corsou, Sint Maarten, Sint-Eustatius y Saba. Na Corsou nan lo bishita e landhuis Knip, caminda e lider di e resistencia, Tula, a causa un disturbio den aña 1795.
Famia Real lo reflexiona tambe tocante e pasado di sclavitud n’e isla di St. Eustatius. Anteriormente Rijksvoorlichtingsdienst a anuncia cu e tema aki lo tabata central durante e bishita di e famia real den Caribe.
Ademas di e actividadnan relaciona cu e pasado di sclavitud, famia real tambe lo bishita varios institucion deportivo, organisacion cultural y parke di naturalesa. Nan bishita na Sint Maarten lo ta principalmente dedica na e reconstruccion di e isla despues di e desaster cu horcan Irma a causa na aña 2017.
Diahuebs 9 di februari ta nan ultimo dia di biaha, cu tin como meta, pa introduci Princesa Amalia na Caribe. Esaki ta e prome biahe di e princesa heredero.
Secretario di Estado, Alexandra van Huffelen, lo biaha hunto cu nan.
