Gihae Gymnastics Stichting ta participa den dos competencia Internacional di gymnasia e luna aki. Ta trata di e competencianan Magical Classic Meet y Presidential Classic Meet na Orlando Florida. Tur dos competencia ta reconoci door USA competition cu ta e Federacion di Gimnasia na Merca.
E fin di siman aki, esta 10-12 di februari, un total di diescinco atleta ta competi di Aruba na Magical Classic Meet. E alumnonan ta competi den nivelnan 1, 2, 3 y 4.
E fin di siman di 17-19 di februari, lo competi cu 24 atleta di Aruba na e Presidential Classic Meet. Na e competencia aki nos lo competi den nivelnan 1, 2, 3, 4, 5, 7 y 9.
Gihae gymnastics a cuminsa cu baby gymnastics yama kangaroo gymnastics. Awor e atletanan cu a cuminsa cu edad di dos aña ta competi den e nivelnan 1, 2, 3 y 4. Y por weita e fruto di e vision ora a cuminsa cu e scol na 2016.
“Nos ta hopi orguyoso y agradecido di e esfuerso y dedicacion di nos coachnan pa prepara nos teamnan. Nos coach di seleccion nacional Jimmy Jose Palma Villegas y headcoach di Gihae Gymnastics Master den educacion fisico y hues di Federacion Internacional di Gimnasia (FIG) Himilce Casares”, Gihae Gymnastics Stichting a informa.
Y sigur un palabra di gradicimento ta bay na tur e mayornan di Gihae Gymnastics cu nan a haci nan esfuerso pa nan yiunan por participa na e dos competencia aki.
