Presidente y CEO di AHATA, Tisa LaSorte, orguyosamente a anuncia na su miembronan cu na 2023 ta introduci e AHATA Impact Award. Meta di e programa di premiacion ta pa reconoce esfuerso di companianan responsabel, miembro di AHATA, cu ta invertiendo den y mehorando nos comunidad.
Lo tin premio separa den cuater pilar clave di sostenibilidad:
· Caridad (donacion financiero of trabao boluntario)
· Promocion cultural
· Proteccion di nos medio ambiente.
· Contribucion na calidad di bida di empleado.
AHATA a colabora cu cinco representante di organisacionnan respeta na Aruba pa desaroya e rekisitonan pa e premionan y criterio pa evaluacion. E mesun cinco persona lo funciona como e team di hurado pa evalua e aplicacionnan y scoge cuater ganado.
E panel di hurado ta:
· Daniel Tecklenborg, Director di CEDE Aruba
· Franciele Laclé; Consultor di Desaroyo Sostenibel
· Ray-Ann Hernandez, Directora di UNOCA
· Jan Noordzij, Gerente di “Advance Human Resources Services”
· Rosabelle Illes, PHD, Psicologo y Profesor-Assistent na Universidad di Aruba
Durante un evento special na juni, lo anuncia e cuater ganadonan di AHATA Impact Award 2023.
Cu e programa di premiacion nobo, AHATA ta apoya empresanan sostenibel y ta spera di inspira mas compania pa inverti den e pilarnan di sostenibilidad cu ta sigura un bon futuro pa nos isla.
