ORANJESTAD – Dia 27 di februari proximo ta inicia cu e renobacion di Compleho Deportivo Guillermo Prospero Trinidad na Dakota. Asina minister di deporte Endy Croes a confirma dialuna. Dia 10 di maart 2023, lo tin un programa chikito, unda cu simbolicamente ta inicia cu e renobacion di Compleho Guillermo Prospero Trinidad cu desde aña 1994 no a wordo renoba. Banda di esaki, Minister Croes a anuncia cu Presidente di Comite Olimpico Internacional, Thomas Bach y Presidente de Panam Sports, Neven Ilic ta bay ta na Aruba pa un evento di Comite Olimpico y lo ta presente dia 10 di maart na e acto simbolico na Compleho Deportivo Guillermo Prospero Trinidad. Minister Croes a indica durante conferencia di prensa cu desde aña 2016 e weganan internacional cu mester tuma luga na e stadion a keda desaproba. Ta planifica pa renoba, entre otro, e tribuna, dak, luz, tegels, VIP sector, yerba artificial y “atletiekbaan”. Pues, ta bay tin trabou grandi y esaki lo ta parti den fase. Ta premira cu e proceso di renobacion lo dura maximo 8 luna y den luna di october di aña 2023 e stadion ta den un bachi completamente nobo.
