ORANJESTAD – Propietario y gerente di Bucuti & Tara Beach Resort Ewald Biemans eleva henter e area di Low Rise cu ta conta cu 6 hotel den e area aki. Esaki e la presenta na minister di turismo Dangui Oduber y director di DOW Marlon Croes. E proposicion di Bucuti & Tara Beach Resort ta pa den e fase 2 di e proyecto di embeyecimento Eagle Beach eleva henter e area infrastructural di e Low Rise area. Actualmente e area aki no ta acapara tur e autonan cu ta parkeer. E situacion actual ta trece peliger pa e peatonnan (turista) cu ta trafica den e area aki. Den e plan proponi pa Bucuti & Tara Beach Resort nan kier construi un parkinlot nobo, crea un pad pa peaton y ciclista cu ta conecta riba esun di proyecto di Eagle Beach fase 1.
Segun gobierno, e plan cu a keda presenta sigur ta un bon plan cu lo eleva e producto Aruba. E ta bay crea mas siguridad den e caya aki pa nos bishitantenan. E plan aki ta un partnership entre Gobierno, Bucuti & Tara Beach Resort y e otro resortnan di Time Share cu tambe ta riba e strip aki pa participa hunto den upgrading di henter e area aki.
