WILLEMSTAD – Partido di MFK no ta muchu kontentu ku sierto parlamentarionan miembro di Partido Nashonal di Pueblo (PNP), i el a laga e partido komprondé esei bon kla ayera nochi despues di e reunion públiko. Teniendo kuenta ku e situashon di malkontentu aki, direkshon di MFK a pidi un reunion ku dirigentenan máksimo di PNP pa pone kabes di e dos parlamentarionan aki na pareu.
Ayera nochi den deklarashon, sr. Sithree van Heydoorn a splika ku lamentablemente den kontinuashon di e reunion riba refineria tin dos miembro di PNP ku a vota pro un moshon ku a keda presentá pa oposishon. Segun sr. van Heydoorn, tin pasashinan den e moshon ei ku ya tabata superfluho, i ademas ta di spera ku miembronan di koalishon ta konsultá ku otro promé ku disidí den ki direkshon ta bai ku nan voto.
Referiendo klaramente na e dos parlamentarionan di PNP, srs. Gwendell Mercelina Jr. i Sheldry Osepa, el a splika ku MFK a ser sorprendí den e kaso aki ya ku nan a bai di akuerdo ku e moshon di oposishon sin previo konsulta. I ta kada bes koalishon/MFK ta ser konfrontá ku sorpresanan for di e mesun dos parlamentarionan aki. Finalmente e votashon riba e moshon a Sali empatá na 9. Awe nan a bai di akuerdo ku un moshon den kual ta pidi pa hasi investigashon den e kaso di CPR, pero ta konosí ku a base di e denunsianan ku tin kaba, outomátikamente ta bai investigá. Sr. van Heydoorn a bisa asta ku esaki ta e último gota i ku MFK no ta soportá mas.
Esei a pone ku na final di e reunion den Staten ayera, dirigentenan di MFK a tene un reunion di urgensia aya na Lam Yuen den Saliña, i a keda disidí ku ta tuma kontakto ku presidente di PNP pa un reunion di urgensia awe mainta mes. Segun van Heydoorn, simplemente MFK no ta kontentu pa e manera kon nan ta ser sorprendí kada bes. Naturalmente un moshon ta un deseo, e no ta mara niun hende na nada, pero por ta kosnan mas serio i no ta bai warda pa bini ku otro sorpresa.
Den e reunion di awe mainta MFK lo ke tende di liderazgo di PNP si por konta ku sosten di nan kuater asientonan. Echo ta ku MFK lo no sigui tolerá e tipo di komportashon aki. MFK no tin problema ku krítika, kada ken ta ehersé nan trabou di akuerdo ku nan konsenshi, pero ora bo ta den un koalishon bo no ta sorprendé otro. A bira un kustumber ku e dos parlamentarionan aki ta pone kara di ministernan na bèrgwensa, siendo ku kasi nunka nan tin rason den loke nan ta trese dilanti. NOTA: E texto ta scirbi den Papiamento fonetico di Corsou.
