Na e momentonan aki tin un homber Rubiano cu mester presenta den Corte na New York, acusa di a comete fraude den Salud Publico na Merca. Ta trata di e homber Rolando Chumaceiro, miho conoci cono “Chuma”. Luna pasa a detene e dokter Arubiano, hunto cu 12 otro persona mas, sospecha di ta envolvi den un fraude miyonario.
E caso aki tin di haber cu un fraude di mas o menos 100 miyon dollar. Ta papia aki di acusacion di fraude, labamento di placa y un skema di soborno. Den e caso aki hasta tin polis, dokter y abogado envolvi y considera como un di e fraudenan mas grandi den historia.
Un parti tin di haber tambe cu un skema di fraude di seguro di auto. Mester menciona cu ocho di e diestres sospechosonan tin acusacionnan di conspiracion pa comete fraude, labamento di placa, soborno y stroba husticia di haci su trabou, dunando testimonio falso na autoridad federal y tambe ta acusa nan di ta horta identidad di hende inocente.
E acusacion oficial di husticia Mericano ta cu e grupo a soborna no menos di 911 operador di seguro, empleadonan di hospital y otronan pa haya informacion confidencial di victimanan di accidente di auto. Cu e informacion aki, ta pone e victimanan na peliger door di pone nan pasa den procedura medico innecesario y doloroso tin biaha, pa asina, den forma fraudulento, saca mas placa for di companianan di seguro. E consecuencia di e patronchi aki cu nan ta uza, ta trece gastonan mas halto y perhudica tur consumidor den mercado di seguro di auto, ya cu e gastonan di seguro ta aumenta a consecuencia di esaki.
E investigacion ta indica cu lo a paga miyones di Dollar Mericano na dokter y clinicanan cu a brinda servicio no necesario na victimanan di accidente. E gastonan aki na final di cuenta ta bay pa e consumidornan di seguronan priva of e programanan subsidia cu t’ey pa yuda esunnan den necesidad. E caso aki ta resultado di investigacionnan di algun aña y tabata un colaboracion entre autoridadnan federal, estatal y local.
E conspiradornan aki a laba e placa via bufetenan di abogado, entidadnan cu ta cambia checknan pa cash y tabata uza e placa pa cumpra autonan luhoso, holoshinan caro y gasta den vakantie. Ora cu a sinti nan mes descubri, a traha documentonan falso y consecuentemente a purba gaña den e declaracionnan.
Den e lidernan di e conspiradornan Gulkarov, tin algun den e grupo cu no ta dokter. Pero den e otro grupo ta acusa e dokter Rubiano di fam Chumaceiro. Ta acus’e di a prescribi diferente tratamento falso na pashentnan. Awo e ta core riesgo di haya un castigo di 10 aña di prizon.
