WILLEMSTAD – Algun organisashon di animal a entamá kaso kontra di Dierenbescherming, pasombra e instansia aki ta piki kachónan riba kaya i bai ku nan pa despues pone nan drumi. E organisashonnan ta Feed Friends Foundation, Rescue Paws Curaçao Foundation, Stichting Dierenhulp Nederland i Tes Dog Foundation. Nan ta defendé mas tantu e kachó.
Abogado di e organisashonnan mr. Schmitz a bisa ku nan organisashonnan ta atendé ku alrededor di 100 kachó ku ta biba den mondi òf riba kaya, i no sa di unda Dierenbescherming a saka e kantidat di 6000 ku nan ke bai atendé kuné te pa yega na un santuario pa pone e bestianan den dje. Ora pone e santuario no tin hende pa wak e kachónan tur dia ku konsekuensia e bestianan por bringa ku otro i lo por tin un káos den e santuario. E santuario di Dierenbescherming ta plania pa bini na Ronde Klip.
Tambe e organisashonnan a bisa wes ku Dierenbescherming tin di hasi distinshon entre kachó di kaya (zwerfhond) i “straathond”. Pa nan e “straathond” tin su doño. E tipo di kachónan aki ta sali for di kurá di nan kas, kana riba kaya, haña kuminda i anochi ta regresá nan kas. Nan ta di opinion ku Dierenbescherming no por fangu e kachónan aki pasombra nan tin doño. Dierenbescherming mester atendé ku e doñonan dje kachó pa tene nan bestia den kurá. Tambe Dierenbescherming mester duna e doñonan di bestia 1 luna di tempu pa nan por será nan kurá i asina e kachó no por sali riba kaya mas. I tambe pone chip na e kachónan.
Pa loke ta trata e kachónan di kaya, segun e abogado nan no ta hopi. Nan ta biba den mondi òf kantu di kaminda. Nan ta bon kuida i ta leu for di bista di turista. Paso e kachónan ta keda den nan ambiente ora nan haña kuminda i awa. Nan no ta sali bai otro kaminda, segun e abogado.
Tambe e organisashonnan a kuestioná e santuario ku ainda no ta kla, i ku ta kònteiner di awa tin riba e tereno. Tambe ku e waya di di harmónika ku e kurá ta será kuné, e kachónan por subi na dje i sali. Tambe ku no tin niun dak p’e kachónan bai skonde awa bou di dje.
Ofisina di Turismo (CTB) a duna 250 mil florin pa e santuario, i sobra sèn ta usa pa sterilisá e bestianan.
Tambe nan a bisa ku ántes nan tabata traha bon ku Dierenbescherming, tabatin bon komunikashon, pero pa basta ratu esaki a kai na awa. E komunikashon no ta bon mas.
Mr. Schmitz a sigui bisa ku nan organisashon ta hasi posibel ku hende den eksterior por adoptá un kachó na Kòrsou. Por ehèmpel pa bai Ulanda ta kosta 250 euro, e hende ta haña tur kos dje kachó. Nan organisashonnan no ta gana sèn, al kontrario ta gastu di kuminda nan tin.
E organisashonnan di animal ke pa Dierenbescherming dirigí su mes riba alternativa pa baha kantidat di kachó riba kaya, i no fangu kachónan i pa despues pone nan drumi. NOTA: E texto ta scirbi den papiamento fonetico di Corsou.
