ORANJESTAD – Ministerio Publico diaranson a confirma cu ex minister Edison Briesen (MEP) tambe ta sospechoso den e caso penal Kwihi. Asina e vocero Ann Angela a bisa noticiacla.com. Loke no kier a bay den detayes, ta si awor Briesen a bira sospechoso of si ta for di comienso di e caso esaki tabata asina si. “Si, e ta sospechoso den e caso” Angela a sigui bisa. Cu esaki ta bira dos ex minister di e partido cu ta sospechoso di husticia. Un dia prome, premier Wever den un entrevista na prensa a confirma cu a pidi e ex mandatario, cu actualmente ta(bata) consehero pa un minister di e gabinete, pa bay cas pendiente e investigacion.
ROMERO PROME SO
E motibo di e pregunta di e portal aki, tabata cu inicialmente tabata e partido MEP cu tabata esun cu a saca un comunicado unda cu a ‘lamenta’ cu su ex minister ta involucra den e caso aki. Pero ningun momento a haci mencion di sr Briesen, siendo cu e tambe tabata envolvi den e entradanan hudicial ora cu e caso a inicia recientemente. Noticiacla a raporta riba dje tambe, pero e partido y gobierno a referi solamente na Romero, lagando Briesen afo, como si fuera e lo no tabata tabata parti di e entradanan hudicial aunke cu tabatin un na su cas tambe. E siman aki esey a cambia ora cu e awor consehero, a wordo manda cas pa motibo di e investigacion cu tin contra dje tambe.
E CASO
Tabata dia 7 di februari ultimo cu Ministerio Publico a confirma cu e mainta tempran ey a tuma lugar huiszoekingnan bao guia di huez-comisario relaciona cu un investigacion di algun contrato di servicio cera dor di Chris Romero den su funcion di minister e tempo ey (Gabinete Wever-Croes I). E zoekingnan a tuma lugar na cuatro adres. Ta trata un investigacion di Landsrecherche. Mientras cu no aa haci mencion di e otro ex minister, noticiacla a compronde e dia ey tambe cu tabata trata di ex minister Edison Briesen cu tambe a haya bishita di Landsrecherche. Briesen tabata su consehero principal e tempo ey, y awor e ta consehero di un minister di partido MEP. Na e cuatro adresnan a tuma entre otro, portadornan di informacion y administracion den beslag.
