fbpx
March 24, 2023

Golos pa placa: Hudas Iscariot a negocia y traiciona su Salbador

Share on Facebook
Share on Whatsapp
0
0
Golos pa placa: Hudas Iscariot a negocia y traiciona su Salbador
Golos pa placa: Hudas Iscariot a negocia y traiciona su Salbador


For di den testament bieu a profetisa den buki di Zacarias capitulo 11:12-13 tocante e bendemento di Hesus pa 30 piesa di plata. Trinta piesa di plata no tabata un capital, e tabata un placa cu ta uza ora di cumpra un catibo.

Hopi ta calcula e 30 piesa di plata di e tempo ey ta pa maximo US$ 3000.= di awendia. Te cu awe nos por nota con maldad a aumenta rond mundo y con hende ta bende nan mes pa placa of ta bende nan miho amigo of famia pa placa. Tin biaha hasta traiciona y bende un pais pa placa y pa keda den poder.

Despues cu Hesus a lanta Lazaro for di morto e sacerdote- y escribanan tabata busca un forma pa mat’e, pasobra nan tabata tin miedo di e pueblo, door di e entrada di triunfo di Hesus na Jerusalem, caminda e pueblo tabata grita y bisa: “Hosana”, Bendiciona ta Esun cu ta bini den nomber di Señor. ”Bendiciona ta e reino binidero di nos tata David.” “Hosana den altura!” (Marco 11:9+10).

Den e curason malvado di e sacerdotenan y principal a reina rabia door di nan carnalidad y nan a pensa cu un revolucion lo bini. Pasobra e nan no tabatin conocemento spiritual.

Hesus a uza un palabra hopi profundo den Lucas 22;22 bisando: Pasobra di berdad e Yiu di hende ta bay manera a wordo determina, ma ay di e homber ey door di kende e ta wordo traiciona.

Den esaki nos por mira cu Hesus tabata na altura cu e lo ta bay ta den un sufrimento den grandi, pero tambe ora e momento duro a yega E a entrega su mes completamente den man di Su Tata.

Durante e anochi di ultimo cena, Hesus a papia diferente biaha comosifuera e kier spierta Hudas di su eror bisando: Mi ta bisa boso cu un di boso lo traiciona mi (Mateo 26:21). Esun cu hinca su man hunto cu Mi den e comchi ta esun cu lo traiciona mi (Mateo 26:23).

E Yiu di hende mester bay manera ta para skirbi di dj’E, ma ay di e homber ey door di ken e Yiu di hende lo wordo traiciona, lo tabata bon pa e homber ey, si e no a nace nunca (Mateo 26:24).

Hudas, kende a traicion’e, a contesta Hesus y a bisa “No ta ami toch Rabbi, y Hesus a bis’e bo mes a bisa” (Mateo 26:25).

Den Juan 13:27 Hesus a bisa Hudas locual bo tin di haci hacie lihe.

Pero nos tin cu corda den Lucas 9:1, Hudas hunto cu e otro diesdos discipulonan a ricibi poder y autoridad riba tur demoño y pa cura tur enfermedad. Y den Lucas 22:3 ta para skirbi cu satanas a drenta Hudas Iscariot, siendo un di e diesdos nan.

Hudas no tabata sigui Hesus cu pensamento Spiritual, pero pa ganashi propio, ambicion mundano, pichiri, golos pa placa, poder y prestigio. Pasobra e tabata maneha e finansas, como tesorero.

Ta posibel pa un hende haci manera e ta cu Dios, pero su curason ta leu for di Dios. Pero locual ta pasa ta cu hende no por gaña Dios. Hesus den su misericordia y compasion a papia cu Hudas, pero Hudas den su dureza di curason, no a reacciona. Corda bon cu ta Hudas a bay negocia y puntra cuanto placa ta page pa e entrega Hesus, y no ta e sacerdotenan a bini cerca Hudas. Nunca duna luga na diabel den bo curason.

Sinceramente,

Pastoor Marcel Balootje.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.