ORANJESTAD – E bloke di sindicatonan SEPPA, SIMAR, SPA, FTA y SADA a marcha diahuebs mainta pa Bestuurskantoor unda cu nan a entrega un manifiesto na gobierno como protesta contra e ley di prestatie management. Esaki ta e ley cu ta duna gobierno e autoridad pa evalua trahadonan a base di nan prestacion prome cu por compensa nan den esaki. Notable ta e hecho cu sindicato TOPA a hala atras y no participa. A compronde cu esaki a conduci cu e bloke a saca e sindicato for di nan ‘chatgroup’, como protesta.
MANIFIESTO
Den e manifiesto, e punto principal ta cu nan ta ‘exigi pa gobierno revoca e ley aki’, y pa gobierno informa e sindicatonan cu e ley aki a wordo revoca no mas tarda cu dialuna 20 di maart 2023 pa 4’or di atardi. Si nan no haya un contesta positivo pa e fecha ey, nan lo bolbe protesta e siguiente dia esta diamars mainta 8’or pa exigi un contesta. Por lesa e contenido completo di e manifiesto AKI.
