Diasabra 18 y diadomingo 19 di maart 2023 lo tuma luga na Club Aruba Juniors na Socotoro e final di e Torneo Himno y Bandera 2023. E aña aki lo tin participacion di Bonaire Stars for di nos isla ruman Bonaire y Los Amigos di Corsou. Glovers, Astros, Surprise y Aruba Juniors ta e teamnan di Aruba cu ta participa den final. Aruba lo ta bon representa cu hungadonan di trayectorio largo manera Rock Angela, Feliz Thiel, Joy Orman y Alex Falconi.
E teamnan ta parti den dos poule. Poule A ta consisti p’e teamnan Glover, Aruba Juniors y Stars di Bonaire, mientras B tin e teamnan Astros, Surprise y Los Amigos di Corsou. Pa 9:30 AM diasabra mainta umpire lo canta Playball pa Glovers enfrenta Aruba Juniors. E di dos wega cu ta programa pa 11:15 am ta entre Astros y Surprise. Despues ta sigui e weganan Glovers contra Bonaire Stars y Astros lo enfrenta Los Amigos den e ultimo wega di e final di diasabra. Pa 4:30 PM lo tin un wega amistoso entre Boomerang y Tigers. E weganan ta continua diadomingo mainta cu Aruba Juniors enfrentando Bonaire Stars sigui pa Surprise contra Los Amigos. Pa 1:00 pm lo tin e wega di tercer luga di e torneo. E gran final ta hunga entre e ganado di e dos poule. E wega final ta programa pa cuminsa 2:45 pm.
Manera ta tradicion, diasabra 18 di maart, ta bay tin un ceremonia unda cu lo duna homenahe na dos persona cu a contribui na e deporte di softball. Ta trata aki di Ferdinand Flanders di Aruba Juniors y Gordon Toussaint kende ta e entertainer deportivo mas popular cu Aruba a yega di conoce.
Desde 4:00 pm en adelante Gordon Disco lo pone ambiente cu su musica bon varia. Diadomingo durante e final, Je’O 297 di Jersey Isenia lo los algun piesa pa tur bailado presente. Jersey no ta un desconoci den e mundo di musica. Si bo ta gusta wak bon wega di softball den un ambiente familiar ta na Club Aruba Juniors bo mester ta. Nos ta warda bo diasabra y diadomingo pa celebra Aruba su Dia di Himno y Bandera.
